Jehová biduidy xtiitz: «Diti sioʼ ni sibdxaʼ, diti sioʼ galrrioʼob, diti sioʼ galguitz diti sioʼ galgoity». Né láaca goniʼbu: «Saspidxi nís ni rareʼ bisalóto órni ribdxaʼto. Ma diti sasetnaladxto guirá cós mal ni góc ló dzú ni see».

Jehová goloʼbu Adán né Eva lainy toib lagary móz ni góc laa Edén par nabanyibu goxtiguie. Non ñenyibu Jehová, Bixiosbu ni noʼ guibá né ñoʼ xidal xiinyibu né nadalyibu ló Gudxlio reʼ. Adán né Eva diti bisobyibu Jehová, per ni goniiny Jehová dzú bisaʼbu buñgudxlio diti ma bidzaʼni. Ló libro reʼ bisuidyno que Jehová rony que guirebuʼ guirá ni ma goniʼbu. Gobierno xtuny Dios sitné xidal cós sacróyen ló Gudxlio, né modreʼ sarebuʼ ni gochbu Abrahán.

Mápa mer guidxin dzú ro ma diti sioʼ Buñdzab, ma diti sioʼ demony ma diti sioʼ buñ mal. Guiránac buñ ni guiguaʼ ló Gudxlio sienyibu Jehová. Ma diti sioʼ galguitz, ma diti saityno, xalagary ngú guirá dzú siásno né fuers né nakit sioʼ xcalnabanyno por ni nabanyno. Gudxlio reʼ sácni toib lagary móz,  sioʼ galrroníx guáno né stipnés cós sacróyen. Diti sioʼ buñ mal, buñdxibloo, guirá buñ sac buñtzayxat. Mainyguiʼix diti sadzuiby lóono né lóono láaca diti sadzuibyno layimu.

Nigolú sacróyen gac órni Jehová saló guilís guirá buñ ni ma goity. Sacacuentno né sabiʼno buñ ni bibany ló dzú ni see, xomod Abel, Noé, Abrahán, Sara, Moisés, Rut, Ester né David. Layibu sacnéyibu lóono par gonyno Gudxlio reʼ toib lagary móz. Guiráxadit ór sioʼ cós sacróyen ni gonyno.

Jehová raniiny que looy guibanylo ló toib Gudxlio móz. Cú sasuidyno xidal cós sacróyen de Dios, cós ni dipa ma bitzanló ló xpensaryno. Por ngú, ¡guirá dzú guibigaxno Jehová, nigoreʼ né ló dzú ni sietra!