Waraga mi Guriri m’utelowic
Umego ku nyimego mwa ma jumer:
Wan watie dhanu pa Yehova, wamaru Lembe pare, Biblia. Wayio andha nia Biblia ukoro lembe ma tap, etie ku telowic ma cuu pi kwo man enyutho pi mer ma yawe mbe ma Yehova umaru ko dhanu. (Zaburi 119:105; Luka 1:3; 1 Yohana 4:19) Pieno, watie kud ava ma lee nikonyo dhanu mange bende ging’ei lemandha ma pire tek ma nwang’ere i Lembe pa Mungu. Eno uketho watie ku mutoro mi tuko ngo niwodho buku maeni ma thiwie tie Nwang’ ponji niai kud i kpawa mi Biblia. Re wukewek wacod iwu lembe moko nyanok iwi bukune.
Lembe ma pol mi buku maeni, juyiko asagane pir awiya. Ento eromo konyo bende judongo ma gibemito ging’ei lembe lee iwi Biblia. Calu ma Biblia tie buku ma pi dhanu zoo, m’umbe jiji wan ceke wabinwang’u bero kinde ma wabesomo ponji ma tung’ tung’ m’i ie, ma copo konyowa kara wabed ku mutoro mandha.
Buku maeni ujengere iwi Biblia pi nikoro kpawa mi dhanu niai i acaki mi cwic. Jutimo kero lee kara jukor kpawane terere man i ayi ma nyang’ i ie yot; bende juii i kadhiri ma copere, nikorogi nzii ku dhoggi nimakere ku kite ma lembene ubed utimere ko.
Pieno, buku maeni ukoro ngo kende kende kpawa mi Biblia. Wec ma jukiewo man cal ma tung’ tung’ mani i ie, juyikogi i ayi ma ketho ng’atini nwang’ere ve etie kaka ma lembene utimere i ie man ewinjere i kite ma ju ma jukoro pigi giwinjiri ko.
Buku maeni ukonyowa ning’eyo lembe ma Biblia ukoro iwi ju ma gigam giworo Yehova man ju ma gigam giwore ngo. Bende ekonyowa ninwang’u ponji i kum lapor migi. (Jurumi 15:4; 1 Jukorinto 10:6) Buku maeni tie ku thenge 14. I acaki mi thengeman junwang’u lembe ma dongo m’ukoro pi ponji moko ma wacopo nwang’u.
Tekene itie janyodo, kwayu isom ponji maeno karacelo ku nyathin peri man iwec iwi cal bende. I ng’eye, wun ario zoo wucopo somo verse ma ponjine ucungo i wie. Kony nyathin peri unyang’ i winjiri ma tie i lembe m’esomo i Biblia ku ponji ma ni i buku. Jucopo timo kumeno pi nikonyo kadok ng’atu ma wang’e teng’ini kara enyang’ i lembe ma dongo ma nwang’ere i Biblia.
Watie ku genogen nia buku maeni bikonyo dhanu ceke m’adundegi atira, nik’ebed awiya kunoke judongo kara ginwang’ ponji i Lembe pa Mungu man gitii kude i kwo migi. Eno biketho gin de gibimondo i kind juot pa Mungu m’emaru pi nitimo ire thier.
Umego mwu,
Guriri m’utelowic mi Jumulembe pa Yehova
Nen bende
PENJI MA DHANU BEPENJO AKECA
Guriri m’utelowic mi Jumulembe pa Yehova utie ang’o?
Nyo umego mi Guriri m’utelowic gitie gitie rwodhi mi dilo mwa?
