A Lôk tata i gwéha:

Kiki di yé bagwélél ba Yéhôva, di ngwés Bañga yé le Bibel. Di yé nkwoog nkaa le i ñañle bés miñañ mi yé ntiik, i nti bés maéba malam inyu niñ loñge, i nti ki bés manjom malam, ma ma ñéba le Yéhôva a ngwés toi bôt ba binam. (Tjémbi 119:105; Lukas 1:3; 1 Yôhanes 4:19) Di gwé soso ngôñ i hôla bôt bape i nigil tik maliga i yé ikété Bañga i Djob. Inyu hala nyen, di nkon maséé kiyaga i pémés i kaat ini le: “Biniigana u nla ôt ikété Bibel.” Di gwé ngôñ i pôdôl bé ndék mam inyu kaat ini.

Ngéda di bé kôôba ini kaat, inyu libim li bipes gwé, di bé hoñol boñge. Ndi to hala, i nla ki gwélana inyu hôla minhôôlak mi bôt mi mi gwé ngôñ i kéñbaha yi yap i Bibel. Ni le, kiki Bibel i yé kaat i mbéñge hiki wada wés, di nyi, ibabé pééna le bésbobasôna di ga ôt nseñ i témb wan biniigana bi kaat ini, inyule bi nla hôla bés i niñ ikété maséé.

Ni njel miñañ mi Bibel, ini kaat i ñañle bés niñ i bôt ba binam, ibôdôl ni ngéda ba bi héga, i ke ni bisu. Di bi boñ biliya gwobisôna le miñañ mi Bibel mi nene sañsañ, mi tomb ki i nok; di bi liya ki i noode noñ oda kiki mam ma bi bôña.

Ndi i kaat ini i ntoñol ndik bé miñañ mi Bibel nwotama. Bibañga ni bititii bi ngwélana munu, bi nhôla nwet a soñgol le a jôp nyemede ikété ñañ, ndik wee a bé a téé ha yokel, kayéle a pam i nôgda kii bôt di mpôdôl munu kaat ini ba bi nôgda.

Ini kaat i nhôla ki bés i tehe le Bibel i bi tilba inyu bôt ba binam. I mpôdôl bôt ba bi nôgôl Yéhôva ni bôt ba bi nôgôl bé nye, i tindge bés i ôt biniigana mu dihéga tjap. (Rôma 15:4; 1 Korintô 10:6)  I kaat ini i yé nkabak 14 bipes. Bibôdle bi hiki pes bi gwé balôm ba biniigana di nla ôt.

Ibale u gwé man, u nla soñgol i kaat ini lôñni nye, ni kwélél ki bititii bi yé mu. Ndi i mbus, bé boba ni nla soñgol minlôñ mi Bibel i het yigil i mpémél. Hôla ki lok yoñ tole ngond yoñ i léba maada ma yé ipôla jam a nsoñgol ikété Bibel ni biniigana bi nlébna ikété kaat ini. Nlélém likeñge u nla ba loñge inyu hôla nhôôlak mut i bana dinyo malép mu nwin Bibel.

Di nhémle le i kaat ini y’a hôla i bet ba gwé miñem mi ngwés maliga​—boñge kiki minhôôlak mi bôt​—i ôt biniigana bi nlôl i Bañga i Djob, ni i bii gwo bisélél i biniñ gwap. Nseñ w’a ba le yak bo ba ga bégés Djob ikété lihaa jé li gwéha.