Tu Angka Dongannami,

Ala sisomba Jahowa hita, tontu tahaholongi do Bibel. Pos do rohanta Bibel i marisi sejarah na sintong, angka poda na denggan, dohot angka bukti na patuduhon holong ni Jahowa tu angka jolma. (Psalmen 119:105; Lukas 1:3; 1 Johannes 4:19) Lomo rohanami mangurupi angka dongan mamboto Hata ni Debata na adong di Bibel. Alani i, las rohanami paradehon buku “Marsiajar ma sian Bibel”. On ma saotik hatorangan taringot buku on.

Tu angka dakdanak do nian buku on dibahen. Alai, buku on pe marguna do tu halak na magodang na laho mamboto gumodang hatorangan taringot Bibel. Buku tu saluhut jolma do Bibel. Alani i, boi ma tadapot laba jala tahilala las ni roha molo taparrohahon angka parsiajaran sian i.

Buku on marisi cerita na dibuat sian Bibel. Dipaboa do di buku on cerita sejarah ni jolma mulai sian tingki baru ditompa dope. Berurutan do dibahen hami angka cerita di buku on, asa tangkas jala mura diantusi angka na manjaha.

Alai ndang holan paboahon cerita na sian Bibel isi ni buku on. Dibahen do angka gambar dohot hatorangan na denggan, asa boi angka panjaha mangkilala na masa di cerita i.

Buku on mangurupi hita mamboto angka cerita na di Bibel taringot halak na mangoloi Jahowa dohot angka halak na mangalo Ibana. Jala boi ma tadapot parsiajaran sian i. (Rom 15:4; 1 Korint 10:6) Adong 14 bagian di buku on. Di mula ni bagian i, dibahen do ringkasan taringot aha na boi taparsiajari sian angka cerita di bagian i.

 Hamu angka natua-tua, jahahon hamu ma sada parsiajaran sian buku on tu gellengmuna jala bahas hamu ma angka gambarna. Dung i, rap ma hamu manjaha angka ayat na adong di parsiajaran i. Urupi ma gellengmuna mangantusi na sian Bibel do dibuat angka parsiajaran na di buku on. Boi do songon i dibahen hamu tingki mangurupi halak na magodang mangantusi isi ni Bibel.

Anggiat ma buku on boi mangurupi angka halak na matua dohot na poso, na mauas male tu Hata ni Debata. Jala boi ma nasida mangulahon parsiajaran na sian Bibel di parngoluon nasida. Ujungna, boi ma nasida manomba Jahowa rap dohot hita.