Namumutan na mga Kapagtubod:

Bilang mga parasamba ni Jehova, dakulaon an pagpapahalaga ta sa saiyang Tataramon, an Bibliya. Kumbinsido kita na tama an kasaysayan na nakasurat diyan, masasarigan an mga giya kaiyan para sa pamumuhay, asin na saro iyan na nakakaugmang patunay kan pagkamuot ni Jehova sa mga tawo. (Salmo 119:105; Lucas 1:3; 1 Juan 4:19) Gustuhon tang tabangan an iba na manudan an mahalagang marhay na mga katotoohan na yaon sa Tataramon nin Diyos. Dahil diyan, nauugma nanggad kaming iluwas an librong ini, Mga Leksiyon na Manunudan Mo sa Bibliya. Gusto ming sabihon saindo an nagkapirang bagay manungod sa librong ini.

Ginibo an librong ini para sa mga aki. Pero, magagamit man ini para tabangan an mga adulto na gustong madagdagan an kaaraman sa Bibliya. Asin dahil an Bibliya sarong libro para sa gabos, siguradong gabos kita makikinabang pag pinag-adalan ta an mga leksiyon na ini na makakatabang sa sato na magin tunay na maugma.

Ginamit sa librong ini an mga salaysay sa Bibliya para iistorya an kasaysayan kan mga tawo puon sa paglalang. Hininguwang marhay na gibuhon na malinaw saka simple an mga istorya sa Bibliya, asin sagkod na posible, ginibo iyan base sa pagkasunod-sunod kan mga pangyayari.

Pero, dai sana isinasaysay kan librong ini an mga istorya sa Bibliya. Ginibo an mga ritrato asin mga tataramon sa librong ini sa paaging matatawan nin buhay an mga istorya sa Bibliya asin maipapahiling an mga namamatian kan mga karakter sa istorya.

Tinatabangan kita kan publikasyon na ini na masabutan na an Bibliya sarong libro manungod sa mga tawo—idtong mga nagsunod ki Jehova asin idtong mga dai nagsunod. Pinapahiro kita kaiyan na makanuod nin mga leksiyon sa mga nangyari sa sainda. (Roma 15:4; 1 Corinto 10:6) Binanga an librong ini sa 14 seksiyon. Sa kapinunan kan kada seksiyon, igwang sumaryo kan mga leksiyon na manunudan ta.

 Kun saro kang magurang, puwede mong basahon an sarong istorya sa saimong aki dangan pag-ulayan an mga ritrato diyan. Tapos, puwede nindong basahon an mga teksto sa Bibliya kun sain kinua an istorya. Tabangan an saimong aki na mahiling an koneksiyon kan saiyang binabasa sa Bibliya saka kan leksiyon sa libro. Magigin epektibo man an arog kaiyan na paagi pag tinatabangan an sarong adulto na magkaigwa nin ideya mapadapit sa mensahe kan Bibliya.

Linalauman mi na makakatabang an publikasyon na ini sa gabos na tawo na igwa nin tamang kamugtakan nin puso—aki man o gurang—na makanuod sa Tataramon nin Diyos asin iaplikar an mga leksiyon kaiyan sa saindang buhay. Bilang resulta, masasamba man ninda siya bilang mga miyembro kan saiyang namumutan na pamilya.