Yufala We i Ridim Buk Ya:

Yumi we yumi wosipim Jehova, yumi lavem Tok blong hem Baebol. Yumi bilif se ol stori blong bifo we oli stap long Baebol oli tru. Mo tu, Baebol i givim ol advaes we yumi save trastem long saed blong laef, mo i soemaot ol samting we Jehova i mekem long ol man we hem i lavem. (Ol Sam 119:105; Luk 1:3; 1 Jon 4:19) Yumi wantem tumas blong givhan long ol narafala, blong oli kasem save long ol nambawan trutok long Baebol. Taswe, mifala i glad blong raetem buk ya, ?Yu Lanem Wanem Long Ol Stori Blong Baebol? Hemia sam smol save long saed blong buk ya.

Taem mifala i rerem buk ya, mifala i tingbaot ol pikinini fastaem, be buk ya i save givhan tu long ol bigman we oli wantem kasem save moa long Baebol. From we Baebol i blong yumi evriwan, i gud yumi evriwan i ridim ol stori ya, mo yumi traem lanem sam samting we bambae oli givhan long yumi blong kasem trufala glad.

Ol Baebol stori ya oli tokbaot ol man blong bifo, stat long taem ya we God i wokem wol. Mifala i traehad blong mekem ol stori oli klia mo oli isi blong kasem save, mo blong putum olgeta long stret oda folem ol yia we oli hapen.

Buk ya i no talem ol stori blong Baebol nomo. Mifala i traehad tu blong jusum ol tok mo ol pija we oli mekem ol stori oli laef, mo oli soemaot filing blong ol man long ol stori ya.

Buk ya i soemaot se Baebol i tokbaot ol man, mo i pulum yumi blong lanem samting from olgeta we oli obei long Jehova mo olgeta we oli no obei. (Rom 15:4; 1 Korin 10:6) I gat 14 haf long buk ya. Long stat blong evri haf, i gat wan sot fastok blong talemaot sam samting we yumi save lanem long haf ya.

 Sipos yu gat pikinini, maet yu ridim wan stori wetem hem mo tokbaot ol pija. Nao yutufala i save ridim ol vas blong Baebol we stori ya i stanap long olgeta. Givhan long pikinini blong i luksave se samting we hem i lanem long buk ya i kamaot long Baebol. Yu save yusum sem rod taem yu wantem soemaot ol bigfala tingting blong Baebol long wan man.

Mifala i wantem se buk ya i givhan long ol yangfala mo ol olfala we hat blong olgeta i stret, blong oli lanem samting long Tok blong God mo folem long laef blong olgeta. Olsem nao, bambae oli save joen wetem famle blong Jehova blong wosipim hem.