Etẹn Ni Ghaan:

Ne ima na re eguọmwadia e Jehova, Ẹmwẹ ọghẹe nọ re Baibol keghi yẹẹ ima. Ma yayi wẹẹ, te okha hia ni rre uwu e Baibol gele sunu, ma vbe yayi wẹẹ, adia ni rre uwu ẹre keghi re ne ima gha gele sẹtin hẹnhẹn egbe yan kevbe wẹẹ, emwi hia ni rre uwu e Baibol, suigiẹ yọ wẹẹ, e Jehova hoẹmwẹ ima ne emwa nagbọn. (Psalm 119:105; Luk 1:3; 1 Jọn 4:19) Ma wa hoo ne ima ru iyobọ ne emwa ọvbehe, ne iran do rẹn ẹmwata ne kpataki ni rre Ẹmwẹ Ọghe Osanobua. Ọna ẹre ọ si ẹre ne ima na ya oghọghọ rhie ebe na ladian nọ re, “Iruẹmwi Ni Rre Uwu E Baibol.” Lahọ gi ima tama uwa emwi eso ni rre uwu ebe na.

Ibiẹka ẹre a wa rhunmwuda re gbẹn ebe na. Sokpan a gha vbe sẹtin yae ru iyobọ ne eniwanrẹn ni hoo ne iran rẹn e Baibol sayọ. Ugbẹnvbe a miẹn wẹẹ ebe ẹvbo ohoho ẹre Baibol khin, ima hia gha miẹn emwi nibun ruẹ vbọ, nọ gha ya ima gha sọyẹnmwẹ.

Okha ọghe ima ne emwa nagbọn ke ẹghẹ omuhẹn gha dee ẹre ebe na guan kaan. Te a wa hia na gbẹn ebe na vbe odẹ ne khuẹrhẹ, ne emwa hia gha sẹtin rẹn otọre, kevbe wẹẹ te a wa mwamwa okha hia ni rrọọ zẹvbe nọ ya sunu ọkade ọkade.

Ẹi wa re okha ọkpa ẹre ọ rre ebe na. Evba gbẹnnẹ ye ebe na kevbe avbe efoto ni rrọọ keghi re na mwamwaẹn vbe odẹ nọ gha ru iyobọ ne ima ya gha ghee avbe okha na, vbene a miẹn wẹẹ ima ghaa rre evba vbe ọ sunu. Ọ gha vbe ru iyobọ ne ima ya rẹn vbene ọ ghaa ye iran hẹ ighẹ emwa ni rre nene okha.

Ebe na gha ru iyobọ ne ima ya rẹn wẹẹ, emwa ẹre Baibol mobọ guan kaẹn—ke emwa ni họn ẹmwẹ ne Jehova kevbe emwa ni ma họn ẹmwẹ nẹ. Ebe na gha ru iyobọ ne ima, ne ima ya miẹn ẹwaẹn vbe igiemwi ọghe iran. (Rom 15:4; 1 Kọrinti 10:6) Abọ 14 ẹre ọ rre ebe na. Omuhẹn ọghe dọmwadẹ  abọ ni rre ebe na keghi mwẹ ifiẹmwẹ eso na ya gbe ẹre ọrriẹ ighẹ emwi na khian miẹn ruẹ vbe nene abọ.

Adeghẹ evbibiẹ ọmọ ẹre u khin, u sẹtin tie iruẹmwi ọkpa ma ovbuẹ vbọ, uwa ghi vbe ziro yan avbe efoto ni rrọọ. Vbe iyeke ọni, uwa sẹtin vbe tie ako ọghe Evbagbẹn Nọhuanrẹn ne iruẹmwi nii hẹnhẹn egbe yan. Ru iyobọ ne ovbuẹ, ne ọ ya rẹn vbene emwi ne ọ tie re vbe Evbagbẹn Nọhuanrẹn ya guaẹro hẹ ighẹ emwi nọ miẹn ruẹ vbe nene ebe. A gha vbe sẹtin loo obẹlẹ na, vbe a gha ya ebe na gu enọwanrẹn ruẹ emwi.

Ma yaro yọ wẹẹ ebe na gha ru iyobọ ne emwa hia ni mwẹ ekhọe esi—ke ibiẹka ke eniwanrẹn—ne iran ya gha ruẹ Evbagbẹn Nọhuanrẹn kevbe ne iran gha rhie emwi ne iran ruẹ ye uyinmwẹ. Ọna gha ru iyobọ ne iran, ne iran ya gha re ọkpa vbe ẹgbẹe ni koko ga Osanobua vbe uhunmwu otagbọn hia.