A bobejañ ya mbunane bia nye’e:

Bia bebo bisaé be Yéhôva, bia nye’e Mejô mé me ne Kalate Zambe. Bi too ndi na Kalate ate a bili minkañete mi ne betotyii, melebe me ne volô bia, a mam ma liti abim avé Yéhôva a nye’e bia. (Besam 119:105; Luc 1:3; 1 Jean 4:19) Bi bili beta nkômbane ya volô bôte bevo’o na, be’ fe, be yem benya mejôô be ne Kalate Zambe. Asu na bi tôé nsôñan ôte, bi nga kuli kalate nyi; a ne nlô ajô na, “Miñye’elane ya Bible asu bongô.” Tame yene mbamba be mam be ne été.

Kalate nyi a nga dañe kômban asu bongô. Ve jame da, miñye’elane ya été mi ne bo mfi asu benya bôtô ba kômbô tu’a yeme Bible. Nde fe, mbôle Kalate Zambe a nga tiliban asu môt ase, teke vaa nge beté, bia bese bia ye yene mfi ya yé’é miñye’elane mi ne kalate nyi, a nalé a ye volô bia na, bi bi benya meva’a.

Kalate nyi a bili minkañete ya Bible, ataté éyoñ biôm bi nga téban. Bi nga jeñ a ngul ése na, bi bo ntaka’a ya minkañete ya Bible, a na, bi laane mie avale da ye bo tyi’ibi ya wôk.

Ve kalate nyi a nji su’u ve na a laane minkañete ya Bible. Minkañete mise a befôtô ya été bia volô môt a lañe na, a wô’ôtane ve ane a mbe valé éyoñe mame mete me mbe me boba’an.

Miñye’elane ya kalate nyi mia volô bia na bi yem amu jé Bible a ne mfi asu bôte bese—ja’a ba kañe Yéhôva nge momo. Mia tindi fe bia na bi nyoñe besikôlô ya mam me nga kui bôte ya melu mvus. (Beromain 15:4; 1 Becorinthien 10:6) Kalate nyi a bili mengab 14. Atata’a ya ngab ése da bo ôbalebase ya miñye’elane ya été.

 Nge ô ne mbiaé, wo yiane nyoñ éyoñe ya lañe ñye’elan ôse a mone wôé, a timine nye befôtô ba lu’an a ñye’elan ôte. Mvuse ya valé, mia yiane lañ bifuse ya Kalate Zambe bia lu’an a ñye’elan ôte. Volô’ô mone wôé na a yen aval avé mam a te lañe Bible ma lu’an a ñye’elan ôte. Nya môtô ane fe bo avale da éyoñ a lañe kalate nyi asu na, a tu’a wô’ô foé é ne Kalate Zambe.

Nkômbane wongan ô ne na, kalate nyi a volô bezôsôô be bôt bese, bongô a benya bôtô na, be yé’é Mejô me Zambe, a na, be tôñe miñye’elan mi ne été. Nalé a ye volô na bese be kañe Yéhôva, a na, be bo bibu’a ya nda bôte jé a nye’e.