Balima kanulenw:

An minw ye Jehova batobagaw ye, a ka Kuma koo ka di an ye. An lanin b’a la k’o Kuma (Bibulu) be maana minw lakali, tiɲɛnkow lo. A be ladili ɲumanw di an ma ani a kɔnɔkow b’an dusu minɛ sabu u b’a yira ka gwɛ ko Jehova be adamadenw kanu (Zaburuw 119:105; Luka 1:3; 1 Zan 4:19). Tiɲɛnko nafaman minw be Ala ka Kuma kɔnɔ, an b’a fɛ sɔbɛ la ka mɔgɔw dɛmɛ u k’u lɔn. O kama, an ninsɔn ka di ka gafe nin bɔ: “I be se ka kalan minw sɔrɔ Bibulu kɔnɔ.” A’ y’a to an ka gafe nin kɔnɔkow ɲɛfɔ aw ye dɔɔni.

Gafe nin fanba sɛbɛra denmisɛnw lo kosɔn. Nka a be se ka balikuw fana dɛmɛ, minw b’a fɛ ka dɔ lɔn tugun Bibulu koo la. Komi Bibulu sɛbɛra bɛɛ lo kosɔn, siga t’a la, gafe nin kalan bena an bɛɛ nafa. Kalansira minw b’a kɔnɔ, u be se k’an dɛmɛ ka hɛɛrɛ sɔbɛ sɔrɔ.

Gafe nin be basigi Bibulu kan ka adamadenw ka koo lakali, kabi duniɲa dantuma. Jijaliba lo kɛra walisa ka Bibulu ka maanaw lakali ka gwɛ, cogo nɔgɔman na. An y’an seko bɛɛ kɛ fana k’o maanaw lakali i ko koow kɛra ka tugutugu ɲɔgɔn kɔ cogo min na.

Gafe nin tɛ dan ka Bibulu ka maanaw lakali dɔrɔn. Mɔgɔ minw kofɔra a kɔnɔ, kumadenw ni jaaw labɛnna koɲuman walisa k’o mɔgɔw ka dusukunnataw bɔ kɛnɛ kan ani a ka kɛ kalanbaga ɲɛɛ na i ko ale yɛrɛ b’o koow kɛyɔrɔ la.

Gafe nin b’an dɛmɛ k’a faamu ko Bibulu be kuma mɔgɔ sifa nunu koo la: minw ye mɛnni kɛ Jehova fɛ ani minw ma mɛnni kɛ Jehova fɛ. A b’an dɛmɛ fana k’a filɛ an be kalan minw sɔrɔ o mɔgɔw ka koow la (Ɔrɔmukaw 15:4; 1 Korɛntikaw 10:6). Gafe nin  tilanna yɔrɔ 14. Tilanyɔrɔ kelen kelen bɛɛ be daminɛ ni hakilinata jɔnjɔn dɔw ye.

Bangebagaw, aw be se ka kalansenw lajɛ n’aw deenw ye ani ka baro kɛ n’u ye jaaw koo la. O kɔ, kalansenw basiginin be bibulusen minw kan, aw be se k’u kalan ɲɔgɔn fɛ. I deen dɛmɛ a k’a faamu ko a ye hakilinata jɔnjɔn minw sɔrɔ o kalansen kɔnɔ, u bɔra o bibulusenw lo kɔnɔ. An be se k’o ɲɔgɔn kɛ walisa ka baliku dɔ dɛmɛ ka Bibulu kɔnɔko kunbabaw lɔn.

An jigi b’a la ko gafe nin bena mɔgɔ kɔnɔgwɛw bɛɛ dɛmɛ, denmisɛnw fara mɔgɔkɔrɔbaw kan, ka kalanw sɔrɔ Ala ka Kuma kɔnɔ ani k’u sira tagama. O la, olu fana bena se ka Ala bato ani ka kɛ a ka denbayamɔgɔ dɔw ye, a be minw kanu kosɔbɛ.