Ndima Nditọete:

Nnyịn ikọt Jehovah imama Bible etieti. Imenịm ke kpukpru mbụk ke Bible ẹnen, inịm ke Bible esiwụt owo nnennen usụn̄, inyụn̄ inịm ke enye owụt ke Jehovah enen̄ede ama ubonowo. (Psalm 119:105; Luke 1:3; 1 John 4:19) Enen̄ede ọdọn̄ nnyịn ndin̄wam mme owo ẹdiọn̄ọ akpanikọ emi odude ke Bible. Ntre, enem nnyịn tutu ndisio n̄wed emi, “Kpep N̄kpọ to Mbụk Bible.” Yak itịn̄ n̄kpọ ifan̄ iban̄a n̄wed emi.

Ẹnen̄ede ẹwet n̄wed emi ẹnọ nditọwọn̄, edi ẹkeme ndida enye n̄n̄wam ikpọ owo emi ẹnen̄erede ẹyom ndidiọn̄ọ se idude ke Bible. Sia Bible edide n̄wed ofụri owo, iyọbọ ufọn edieke idiọn̄ọde mme mbụk Bible, ndien emi ekeme ndinam esịt enen̄ede enem nnyịn.

Ẹbụk se Bible etịn̄de aban̄a ubonowo ke n̄wed emi, ọtọn̄ọde ke ini emi Abasi okobotde n̄kpọ. Imodomo ukeme ndinam mme mbụk emi ẹdude ke Bible ọsọp an̄wan̄a owo, inyụn̄ iwet mmọ ke adiana ke adiana.

Owo inọhọ mbụk Bible ke n̄wed emi enyọn̄ enyọn̄. Ẹma ẹda ini ẹwet mme mbụk emi ẹnyụn̄ ẹdrọ mme ndise ke usụn̄ emi edinamde mbụk kiet kiet ọsọp an̄wan̄a owo, onyụn̄ owụt nte eketiede mme owo ke mbụk oro ke idem.

N̄wed emi anam ikụt ke Bible etịn̄ aban̄a mme owo nte nnyịn. Ndusụk mmọ ẹma ẹnam se Jehovah amade, ndusụk ikanamke. Imekeme ndikpep n̄kpọ nto mbụk mmọ. (Rome 15:4; 1 Corinth 10:6) Ẹbahade n̄wed emi ẹsịn ke ikpehe 14. Ikpehe kiet kiet ọtọn̄ọ ye ndusụk akpan n̄kpọ emi idikpepde ke ikpehe oro.

 Edieke enyenede eyen, emekeme ndikot mbụk kiet kiet nnọ enye onyụn̄ anam ndise an̄wan̄a enye. Ekem mbufo mbiba ẹmekeme ndikot mme itie Bible oro mbụk oro otode. N̄wam eyen fo okụt ke mbụk n̄wed emi oto Bible. Emekeme ndinam ntre n̄ko ini ekpepde akamba owo n̄wed emi.

Imenịm ke n̄wed emi ayan̄wam mbon emi ẹmade Abasi—n̄kpri ye ikpọ—ẹkpep n̄kpọ ẹto mbụk Bible ẹnyụn̄ ẹnam se mmọ ẹkpepde. Emi ekeme ndinam mmọ ẹtiene ndima ikọt esie ẹnam n̄kpọ esie.