Ore ermáno ha ermanakuéra rohayhuetéva:

Ñande jaadoráva Jehovápe ñamombaʼeterei Iñeʼẽ la Biblia. Ñande jaikuaa porã umi istória oñemombeʼúva pype oñemombeʼuha oiko hagueichaite. Oreko avei heta konsého ideprovéchova ñandéve ha ohechauka mbaʼeichaitépa Jehová ohayhu yvyporakuérape (Salmo 119:105; Lucas 1:3; 1 Juan 4:19). Ñande ningo ñaipytyvõseterei avei ñande rapichakuérape oaprende hag̃ua umi mbaʼe porãita omboʼéva la Biblia. Upévare rovyʼaiterei ropresentávo peẽme ko lívro hérava: Eaprende umi istória oĩvagui la Bíbliape. Romombeʼuse peẽme michĩmi mbaʼe mbaʼépa oreko ko puvlikasión.

Ko lívro ojejapo oñepytyvõ hag̃ua mitãnguérape, péro katuete oipytyvõta avei umi kakuaápe oaprende hag̃ua la Bíbliagui. La Biblia haʼe peteĩ lívro ikatúva oipytyvõ enterovetépe ko múndo tuichakuére. Jastudiáramo umi mbaʼe omboʼéva la Biblia, tuichaiterei ñanepytyvõta javyʼa hag̃ua.

Umi istória oñemombeʼúva ko lívrope oñeguenohẽ la Bíbliagui. Umi istória oñepyrũ Adán guive ha oho hese ñane tiémpo peve. Koʼã istória oñemombeʼu oñentende porã hag̃uáicha ha ikatúma guive oñemoĩ avei pe órden oiko haguépe.

Péro ko lívro ndahaʼéi omombeʼúnteva umi istória, síno umi mbaʼe heʼíva ha umi divúho orekóva ñanepytyvõ ñañeimahina hag̃ua umi mbaʼe oiko vaʼekue ha mbaʼéichapa oñeñandu rakaʼe umi persóna oñeñeʼẽha.

Ko lívrope jahecháta la Biblia oñeʼẽha heta persónare, tahaʼe umi iñeʼẽrendu vaʼekuére Jehovápe ha avei umi naiñeʼẽrendúi vaʼekuére chupe. Ñanepytyvõta avei ñaaprende hag̃ua heta mbaʼe chuguikuéra (Romanos 15:4; 1 Corintios 10:6). Ko lívro oreko  14 seksión. Káda seksión oñepyrũvo omombeʼu mbykymi mbaʼe mbaʼépa ñaaprendéta upe seksiónpe.

Reguerekóramo mitã, ikatu relee hendivekuéra peteĩ kapítulo ha peñeʼẽ umi mbaʼe pehechávare umi taʼangápe. Upéi ikatu pelee umi téxto oĩva pe kapítulo opakuévo. Eipytyvõ ne famíliape ohechakuaa hag̃ua umi mbaʼe oaprendéva hína ko lívrope oĩmbaiteha la Bíbliape. Ikatu avei jajapo upéicha ñaipytyvõ hag̃ua umi kakuaápe oaprendeve hag̃ua umi mbaʼe iñimportánteva omboʼéva la Biblia.

Hiʼãiténgo oréve ko lívro oipytyvõ entéro ipyʼaporãvape, tahaʼe mitã ha kakuaápe, oaprendeve hag̃ua la Bíbliagui ha osegi hag̃ua umi konsého oĩva pype. Péicha haʼekuéra avei ikatúta oadora Jehovápe ha oiko ifamíliaramo.