Pinalangga nga mga Masigkatumuluo:

Bilang mga sumilimba ni Jehova, ginahigugma gid naton ang iya Pulong, ang Biblia. Kumbinsido kita nga matuod ang ginasiling sini parte sa kasaysayan, masaligan ini nga giya sa aton kabuhi, kag pamatuod ini nga palangga gid ni Jehova ang pamilya sang mga tawo. (Salmo 119:105; Lucas 1:3; 1 Juan 4:19) Gusto gid naton buligan ang iban nga mahibaluan ang importante nga mga kamatuoran sa Pulong sang Dios. Bangod sini, nalipay kami nga iaman ang libro nga Mga Leksion nga Matun-an Mo sa Biblia. Tuguti kami nga isugid sa inyo ang pila ka butang parte sa sini.

Ang kalabanan nga bahin sini nga libro gindesinyo para sa mga kabataan. Pero, makabulig man ini sa mga adulto nga gusto magtuon sing dugang sa Biblia. Kag bangod ang Biblia para sa tanan, sigurado gid nga tanan kita makabenepisyo sa pagtuon sa mga leksion sini nga makabulig sa aton nga mangin matuod nga malipayon.

Ini nga libro ginbase sa mga rekord sang Biblia. Ginasugid sini ang parte sa pamilya sang tawo sugod sang pagpanuga. Ginpanikasugan gid nga mapresentar ang mga kasaysayan sa Biblia sa maathag kag simple nga paagi, kag tubtob posible, suno sa pagpasunod sang mga hitabo.

Pero ini nga libro wala lang nagasugid sing mga kasaysayan sa Biblia. Ang mga ginsulat kag mga piktyur diri ginhimo sa paagi nga daw mangin matuodtuod ang mga hitabo kag mabatyagan ang mga ginabatyag sang mga karakter nga ginasambit.

Ini nga publikasyon nagabulig sa aton nga makita nga ang Biblia nagasugid parte sa mga tawo​—mga tawo nga nagtuman kay Jehova kag mga tawo nga wala nagtuman sa iya. Ginabuligan man kita sini nga makatuon sa ila mga halimbawa. (Roma 15:4; 1 Corinto 10:6) Ini nga libro gintunga sa 14 ka seksion. Sa umpisa sang kada seksion, may sumaryo sang pila ka leksion nga aton matun-an.

 Kon isa ikaw ka ginikanan, mahimo mo basahon sa imo bata ang isa ka leksion kag istoryahan ninyo ang piktyur. Dayon puede ninyo nga duha basahon ang mga teksto sa Biblia diin nabase ang leksion. Buligi ang imo bata nga maangot ang iya ginabasa sa Biblia sa leksion nga ginatun-an ninyo. Mahimo nga epektibo man ini nga paagi sa pagbulig sa isa ka adulto para mahibaluan niya ang kabilugan nga mensahe sang Biblia.

Kabay nga makabulig ini nga publikasyon sa tanan nga interesado—bata man ukon tigulang​—nga matun-an ang Pulong sang Dios kag maaplikar ang mga leksion sini sa ila kabuhi. Bilang resulta, masimba man nila sia bilang bahin sang iya pinalangga nga pamilya.