Kovakambure ovakwetu ovasuverwa:

Otjovakarere vaJehova, eṱe twa suvera Embo re, Ombeibela. Tu nongamburiro kutja omakuruhungi wayo omakahu ye yandja omuhunga omuṱakame nu ye raisa orusuvero rwaJehova kovandu. (Epsalme 119:105; Lukas 1:3; 1 Johanes 4:19) Tu nonḓero yatjiri okuvatera varwe okurihonga ouatjiri ounanḓengu mbu ri mEmbo raMukuru. Kunao, tu nonyuṋe okumupa embo ndi Oviṋa mbi mo yenene okurihonga mOmbeibela. Tu yandjera kutja tu serekarere kaṱiṱi ohunga na ro.

Embo ndi tjinenenene ra rongerisirwa ovanatje. Posi yokutja oro wina mari yenene okuungurisiwa i ovandu ovanene mbu mave vanga okurihonga ovingi ohunga nOmbeibela. Nu mena rokutja Ombeibela embo rovandu avehe, tu nongamburiro kutja atuhe matu munu mo ombatero tji twa konḓonona omahongwa wa yo, ngu maye tu vatere okumuna ouṋingandu watjiri.

Embo ndi ri ungurisa omahungi nga za mOmbeibela okutuserekarera oviṋa mbya tjitwa okuza kombutiro yovandu. Pa tjitwa ozongondjero azehe kutja tu yenene okuyandja omahungi wOmbeibela momuano omukahu nomupupu otja paatu yenene, na mongongorasaneno oviṋa mbyo mu vya tjitwa.

Embo ndi kari serekarere omahungi wOmbeibela uriri. Nungwari omambo noviperendero mu ro vya rongerisiwa momuano mbu tjita kutja omahungi wOmbeibela nga ye rire omanamuinyo nu ye raise oumune waimba mba tamunwa mu yo.

Embo ndi ri tu vatera okumuna kutja Ombeibela embo ohunga novandu, imba mba ri nonḓuviro ku Jehova na imba mbe ha ri nonḓuviro. Noro ri tu hinga okurihongera kovihorera vyawo. (Ovaroma 15:4; 1 Ovakorinte 10:6) Embo ndi ra haṋwa motupa 14. Pomautiro  worupa aruhe pe nomakahururiro womahongwa tjiva ngu matu yenene okurihonga.

Tji u novanatje, mo yenene okulesa ehongwa pu nomuatje woye nokuhungirira koviperendero mbi ri mu ro. Okuzambo mamu yenene okulesa orupa rwOmbeibela ku kwa zikamene ehongwa ndo. Vatera omuatje woye okumuna kutja oviṋa mbi ma lese mOmbeibela mavi hitasana vi na imbi mbi ri membo. Mo yenene okutjita omuano otjingewo okuvatera omundu omunene kutja ma mune epu rorupa rwOmbeibela rorive.

Matu zeri kutja embo ndi mari vatere ovandu avehe vomitima omiwa, ovaṱiṱi novanene, okurihonga Embo raMukuru nokuṱakamisa mbi mave lese mu ro mehupo rawo. Okutjita nao, maku ve vatere kutja owo wina ve yenene okurikotamena ku ye otjouṋepo weṱunḓu re esuverwa.