Nuju Pemacha:

Penyembah Jehovah rinduka Jaku Iya, Bup Kudus. Kitai pechaya Bup Kudus ngembuan sejarah ti betul, iring ti beguna ke pengidup sereta bukti pengerindu Jehovah ke ruang bilik mensia. (Masmur 119:105; Luke 1:3; 1 John 4:​19) Kitai keran deka nulung orang bukai belajarka pemendar ti berega ke bisi dalam Jaku Petara. Ketegal nya, kami enggau gaga ati ngeluarka bup tu, Utai ke Ulih Dipelajar Nuan Ari Bup Kudus. Awakka kami madahka nuan mimit pasal bup tu.

Kesuah agi, bup tu disedia ke bala anak mit. Taja pia, bup tu mega ulih dikena nulung orang besai tuai ke keran deka belajar mayuh agi pasal Bup Kudus. Ketegal Bup Kudus bup ke semua orang, semua kitai tentu bulih penguntung ari mansik utai ke dipelajar, ke ulih nulung kitai lantang ati.

Ngena cherita ari Bup Kudus, bup tu madahka pasal ruang bilik mensia berengkah ari pun utai digaga. Mayuh pengawa udah digaga ngambika cherita Bup Kudus ulih ditusui enggau chara ti mudah enggau terang lalu enggau naka ulih, ditusun nitihka maya utai nya nyadi.

Taja pia, bup tu ukai semina madahka cherita Bup Kudus. Teks enggau gambar disedia ngambika cherita ba Bup Kudus idup lalu mandangka asai ati orang ke ba cherita nya.

Litaricha tu nulung kitai meda baka ni Bup Kudus nya bup pasal mensia​​—orang ke ngasika Jehovah enggau orang ke enda ngasika Iya. Lalu bup tu meransang kitai belajar ari teladan sida. (Rome 15:4; 1 Korint 10:6) Bup tu dibagi ngagai 14 begian. Ba pun tiap begian, bisi lansa ke sekeda utai ti ulih dipelajarka kitai.

 Enti nuan apai indai, nuan ulih macha tiap pelajar enggau anak nuan lalu berandauka gambar. Udah nya, seduai ulih macha ayat Bup Kudus ba pelajar nya. Tulung anak nuan meda kaul entara utai ke dibacha ba Bup Kudus enggau pelajar ba bup tu. Chara ti sebaka engka ulih dikena lebuh nulung orang besai tuai nemu pasal utai ba Bup Kudus enggau ngelansa.

Kami arapka litaricha tu ulih nulung semua orang ke lurus ati​​—biak tauka tuai​​—belajar ari Jaku Petara lalu ngena utai ke dipelajar ba pengidup sida. Asil iya, sida mega ulih nyembah Iya nyadi diri sebilik ti dikerinduka Iya.