Patgenmi a Kakabsat:

Kas agdaydayaw ken Jehova, ipatpategtayo ti Saona, ti Biblia. Kombinsidotayo a naglaon dayta iti umiso a salaysay, mapagtalkan a giya iti panagbiag, ken makatukay-puso nga ebidensia nga ay-ayaten ni Jehova dagiti tattao. (Salmo 119:105; Lucas 1:3; 1 Juan 4:19) Kayatmi a tulongan ti sabsabali a mangammo kadagiti napapateg a kinapudno iti Sao ti Dios. Gapuna, maragsakankami a mangipaay iti daytoy a libro, Dagiti Leksion a Masursurom iti Biblia. Isalaysaymi apagbiit ti maipapan iti daytoy a libro.

Nadisenio para kadagiti ubbing ti kaaduan a paset daytoy a libro. Ngem mabalin met nga usaren a tumulong kadagiti adulto a mayat a mangammo iti ad-adu pay maipapan iti Biblia. Ken gapu ta ti Biblia ket libro a para iti amin, sigurado a mabenepisiarantayo amin no adalentayo manen dagitoy a leksion a makatulong tapno agbalintayo a pudpudno a naragsak.

Babaen kadagiti salaysay iti Biblia, ipakita daytoy a libro ti pakasaritaan ti tao manipud iti panamarsua. Inkagumaanmi nga iparang dagiti salaysay ti Biblia iti nalawag ken simple a pamay-an ken, agingga a posible, sigun iti panagsasarunoda.

Nupay kasta, saan laeng a basta iyestoria daytoy a libro dagiti salaysay iti Biblia. Naisagana a naimbag dagiti sasao ken ladawan tapno agbalin a nabiag dagiti salaysay iti Biblia ken marikna ti agbasbasa ti rikna dagiti karakter.

Tulongannatayo daytoy a publikasion a mangkita a ti Biblia ket maysa a libro maipapan kadagiti tattao a nagtulnog ken Jehova ken kadagiti nagsukir kenkuana. Tulongannatayo met a mangkita kadagiti masursurotayo kadagiti inaramidda. (Roma 15:4; 1 Corinto 10:6) Adda 14 a seksion daytoy a libro. Iti kada rugi ti seksion, adda sumario dagiti masursurotayo a leksion.

 No maysaka a nagannak, mabalinmo nga ibasa iti anakmo ti maysa a leksion sa pagsaritaanyo dagiti ladawan. Kalpasanna, mabalinyo a basaen dagiti teksto iti Biblia a nakaalaan ti leksion. Tulongam ti anakmo a mangkita iti koneksion ti teksto a binasana ken ti leksion iti libro. Mabalin nga epektibo met daytoy a pamay-an iti panangtulong iti maysa nga adulto a mangammo iti pakabuklan ti mensahe ti Biblia.

Namnamaenmi a makatulong daytoy a publikasion iti amin a mangay-ayat iti kinalinteg—ubbing ken nataengan—tapno makasursuroda iti Sao ti Dios ken tapno mayaplikarda dagiti leksion a maadalda. Kas resultana, agdayawda met iti Dios ken agbalinda a miembro ti ay-ayatenna a pamilia.