Tsawra ai ni e:

Yehowa hpe nawku dawjau ai ni hku nna, anhte ni gaw shi a Mungga re ai Chyum Laika hpe tsawra ga ai. Chyum Laika gaw, shinggyim masha ni a matu Karai a tsawra myit madun ai madi madun lam re. Prat hkrun lam hte seng nna kamhpa mai ai lam matsun hte tup hkrak teng man ai labau mung lawm ai. (Shakawn 119:105; Luka 1:3; 1 Yawhan 4:19) Karai a Mungga hta lawm ai manu dan ai teng man lam ni hpe, kaga ni chye wa hkra anhte karum ya mayu ga ai. Dai majaw, Chyum Laika Kaw Nna Sharin La Lu Ai Lam Ni ngu ai ndai laika buk hpe shapraw dat ai re. Ndai laika buk a lam loi mi tsun dan mayu ai.

Ndai laika buk hta lawm ai lam law malawng gaw, ma ni a matu yaw shada nna ka da ai re. Raitim, Chyum Laika a lam grau nna chye mayu ai masha kaba ni hpe karum ya na matu mung akyu jashawn mai ai. Chyum Laika gaw masha yawng na matu re ai majaw, anhte hpe ngwi pyaw shangun ai ndai laika buk kaw nna sharin la lu ai lam ni hpe maram yu ai gaw, teng sha akyu lu wa shangun na re.

Ndai laika buk gaw, hpan da ai aten kaw nna shinggyim masha labau lam ni hpe, Chyum Laika hte lakap nna tsun dan da ai. Chyum Laika labau ni hpe asan sha chye na lu na matu ka da nna, dang lu ai daram azin ayan shakut nna ka da ya ai.

Ndai laika buk gaw Chyum Laika labau ni hpe tsun dan ai daram sha n re. Laika ga si ni hte sumla ni gaw, Chyum Laika labau lam ni hpe myi hta pra mu wa hkra hte, dai hta lawm ai masha ni a hkamsha lam hpe, atsawm chye wa hkra mung karum ya ai.

Ndai laika buk gaw, Chyum Laika hta lawm ai, Yehowa a ga madat ai ni hte n madat ai ni a lam hpe chye hkra, anhte hpe karum ya ai. Shanhte a kasi ningli kaw nna mung anhte sharin la lu ai. (Roma 15:4; 1 Korinhtu 10:6) Ndai laika buk hpe pang 14 garan da ai. Pang  shagu a shawng hta anhte sharin la lu na lam ni hpe kadun dawk tsun dan da ai lam lawm ai.

Nang gaw kanu kawa rai yang, laika pang ni hpe na a ma hte arau hti nna, sumla ni hpe arau bawng ban u. Dai hpang, lakap da ai chyum daw ni hpe arau hti mai ai. Chyum Laika kaw nna hti lu ai lam hte laika buk kaw lawm ai lam hpe, na a ma matut mahkai chye hkra karum ya u. Chyum Laika hpe sawn maram yu lu hkra, masha kaba hpe karum ya ai shaloi mung, dai zawn galaw mai ai.

Myit dingman ai asak kaji kaba yawng, Karai a Mungga kaw nna sharin la lu ai lam ni hpe prat hta tatut hkan sa lu hkra, ndai laika buk gaw karum ya lu na ngu anhte myit mada ga ai. Shanhte mung Yehowa hpe nawku wa nna, shi tsawra ai nta masha langai byin wa u ga.