Mũsomi Mwendwa:

Ithyĩ twĩ athaithi ma Yeova nĩtwendete Ndeto yake, Mbivilia. Nĩtwĩthĩawa na mũĩkĩĩo mũlũmu vyũ kana isitoli ĩla yĩ Mbivilianĩ nĩ ya wʼo, kana Mbivilia nĩtonya kũtũtongoesya thayũnĩ, na kana nĩyĩeleetye nesa ũndũ Yeova wendete andũ mũno wĩana. (Savuli 119:105; Luka 1:3; 1 Yoana 4:19) Na nũndũ wa ũu, nĩtwendete mũno kũtetheesya andũ ala angĩ memanyĩsye ũvoo ũla wĩ Ndetonĩ ya Ngai. Na kyu nĩkyo kĩtumi tũkwenda kumya ĩvuku yĩĩ yĩ na kyongo, Maũndũ Ũtonya Kwĩmanyĩsya Mbivilianĩ. Ĩndĩ eka twambe ũkũelesya maũndũ amwe me ĩvukunĩ yĩĩ.

Kĩeleelo kĩnene kya kũandĩka ĩvuku yĩĩ nĩ kũtetheesya syana. O na ũu wĩ o vo, nĩyĩtonya kũtetheesya andũ aima ala mekwenda kũmanya maũndũ maingĩ kuma Mbivilianĩ. Na nũndũ Mbivilia no ĩtethye kĩla mũndũ, vate nzika ithyonthe nĩtũtonya kũtetheka mũno twasoma maũndũ ala maeleetwʼe ĩvukunĩ yĩĩ. Kwa wʼo maũndũ asu no matume twĩthĩwa na ũtanu.

Ĩvuku yĩĩ nĩyĩtũmĩĩte maandĩko kũelesya maũndũ kuma yĩla mũndũ wa mbee woombiwe na kũendeea. Maũndũ ala me ĩvukunĩ yĩĩ maeleetwʼe kwa nzĩa yĩ laisi na kwosana na ũndũ maatĩanĩe.

Ĩndĩ ĩvuku yĩĩ yĩ na maũndũ maingĩ eka o kũelesya maũndũ ala me Mbivilianĩ. Yĩ na ũvoo ũandĩkĩtwe nesa vamwe na visa nzeo nĩ kana itetheesye mũsomi aelewe ngewa ila syĩ Mbivilianĩ na aikwatya ũndũ ala maeleetwʼe vo matonya kwĩthĩwa meewʼaa.

Ĩvuku yĩĩ nĩyĩũtũtetheesya kwona ũndũ Mbivilia yĩeleetye ĩũlũ wa andũ ma ĩvinda ya tene, ala mamwĩwʼaa Yeova na ala matamwĩwʼaa. O na ĩngĩ, nĩyĩũtũtetheesya kwona maũndũ ala tũtonya kwĩmanyĩsya twasũanĩa ngelekanyʼo yoo. (Alomi 15:4;  1 Akolintho 10:6) Ĩvuku yĩĩ yĩ na ilungu 14. Kĩla kĩlungu kĩiambĩĩa nĩkĩeleetye kwa ũkuvĩ maũndũ ala tũtonya kwĩmanyĩsya kĩlungunĩ kĩu.

Ethĩwa wĩ mũsyai, no ũtwʼe kũsoma ĩsomo ĩna na mwana waku na mũineenea visa ũla wĩ vo. Na ĩndĩ no mũsome vamwe maandĩko ala maeleetye ĩsomo yĩu. Tata ũtetheesye mwana waku one ũndũ maandĩko ala mwasoma makwatĩte mbau ĩsomo yĩla yĩ ĩvukunĩ yĩĩ. O na ĩngĩ, nzĩa ĩsu no ĩtũmĩwe kũtetheesya andũ aima maelewe maũndũ ala me Mbivilianĩ.

Twĩ na wĩkwatyo kana ĩvuku yĩĩ nĩyĩũtetheesya onthe ala me na ngoo nzeo, methĩwe nĩ syana kana nĩ andũ aima, memanyĩsye Ndeto ya Ngai na mayĩatĩĩa maũndũ ala mekwĩmanyĩsya. Meeka ũu, o namo makatanĩa kũmũthaitha Ngai me ngwatanĩo na andũ make.