Ex qech aj paabʼanel:

Laaʼo li nokoorahok re li Jehobʼa naqara li Raatin, li Santil Hu. Chʼolchʼo chiqu naq chisaʼ tzʼiibʼanbʼil chi tzʼaqal re ru li xkʼulmank chaq, ebʼ li chaabʼil naʼlebʼ li nokooxtenqʼa saʼ li qayuʼam ut ebʼ li eetalil li naxkʼutbʼesi li xrahom li Jehobʼa chirixebʼ li poyanam (Salmo 119:105; Lucas 1:3; 1 Juan 4:19). Naqaj chi anchal qachʼool xtenqʼankil ebʼ li junchʼol re naq teʼxtzol li yaal li wank saʼ li Raatin li Yos. Joʼkan naq, nasahoʼk saʼ qachʼool xkʼutbʼal cheeru li tasal hu aʼin: Ebʼ li naʼlebʼ li nintzol saʼ li Santil Hu. Naqaj xseeraqʼinkil eere wiibʼ oxibʼ li naʼlebʼ chirix li tasal hu aʼin.

Li tasal hu aʼin kʼoxlanbʼil ut kʼubʼanbʼil choʼq rehebʼ li kokʼal. Abʼanan, naru nakʼanjelak ajwiʼ choʼq rehebʼ li ak ninqebʼ li nekeʼraj xtzolbʼal xkomon li naʼlebʼ chirix li Santil Hu. Ut, saʼ xkʼabʼaʼ naq li Santil Hu nakʼanjelak choʼq re chixjunil li ruuchichʼochʼ, chʼolchʼo naq chiqajunilo tqataw rusilal xjultikankil li naʼlebʼ li naxkʼe qe, xbʼaan naq truuq qatenqʼankil chi xtawbʼal li sahil chʼoolejil.

Joʼ naxye li Santil Hu, li tasal hu aʼin naxseeraqʼi li xyuʼamebʼ li poyanam chalen chaq saʼ xtiklajik li yobʼtesihom. Xkʼoxlamank chiʼus li junjunq chi naʼlebʼ re naq inkʼaʼ chʼaʼajkaq xtawbʼal ru ut, naq xruhank, xkʼemank chi tustu joʼ chanru xkʼulmank chaq.

Abʼanan, li hu aʼin moko kaʼaj tawiʼ naxseeraqʼi ebʼ li naʼlebʼ li wank saʼ li Santil Hu. Ebʼ li tzʼiibʼ joʼ ajwiʼ ebʼ li eetalil kʼubʼanbʼil re naq chixjunil li naxye chisaʼ chanchan tawiʼ yooko rilbʼal chi kutankil li yook chi kʼulmank ut naxkʼut kʼaru nekeʼrekʼa ebʼ li nekeʼnaʼlebʼak aran.

Li tasal hu aʼin nokooxtenqʼa chi rilbʼal naq li Santil Hu aʼan jun li hu li naʼaatinak chirixebʼ li keʼabʼink chiru li Jehobʼa ut ebʼ li inkʼaʼ keʼabʼink chiru. Nokooxtenqʼa ajwiʼ chi xtawbʼal qanaʼlebʼ chirix li keʼxbʼaanu chaq ebʼ li poyanam aʼin (Romanos 15:4; 1 Corintios 10:6). Saʼ li tasal hu aʼin wank 14 chi tasal. Saʼ xtiklajik li junjunq, wank wiibʼ oxibʼ li naʼlebʼ li naru naqatzol.

 Wi wank aakokʼal, naru taawil jun li tzolom rikʼinebʼ, ut saʼ komonil texʼaatinaq chirixebʼ li eetalil. Chirix chik aʼan, texruuq xyaabʼasinkil li raqal li Santil Hu bʼarwiʼ isinbʼil chaq li tzolom. Tenqʼahebʼ laakokʼal chi rilbʼal chanru naxchap ribʼ li Santil Hu rikʼinebʼ li naʼlebʼ li wank saʼ li junjunq chi tzolom. Li naʼlebʼ ajwiʼ aʼin naru roksinkil rikʼin junaq chik li poyanam re naq tixtzol rikʼin wiibʼ oxibʼ li aatin kʼaru li esil wank saʼ li Santil Hu.

Naqaj naq li tasal hu aʼin tixtenqʼahebʼ li poyanam li chaabʼilebʼ xchʼool, joʼ saaj joʼ cheek, chi xtzolbʼal li Raatin li Yos ut xyuʼaminkil li naʼlebʼ li naxkʼe. Chi joʼkan aʼanebʼ ajwiʼ teʼruuq xloqʼoninkil li Jehobʼa ut teʼwanq saʼ li xjunkabʼal li Yos.