Aarĩ na Ariũ a Ithe Witũ Ende:

Tondũ tũrĩ athathaiya a Jehova, nĩ twendete Kiugo gĩake Bibilia. Tũkoragwo na ma atĩ nĩ ĩtũheaga ũhoro wa historĩ ĩtekũhĩtia, ĩgatũhe ũtongoria mwega wa ũrĩa twagĩrĩirũo gũikara, na ĩgatũhe ũira mũiganu wa kuonania ũrĩa Jehova endete andũ. (Thaburi 119:105; Luka 1:3; 1 Johana 4:19) Nĩ twĩriragĩria mũno gũteithia andũ arĩa angĩ merute ũhoro wa ma ũrĩa ũrĩ thĩinĩ wa Kiugo kĩa Ngai. Nĩ ũndũ ũcio, tũrĩ na gĩkeno kũruta ibuku rĩrĩ rĩa “Maũndũ Marĩa Ũngĩĩruta Kuumana na Bibilia.” Rekei tũmũtaarĩrie hanini ũhoro wa rĩo.

Icunjĩ nyingĩ cia ibuku rĩrĩ, ihaarĩrĩirio nĩguo igune ciana. O na kũrĩ ũguo, no rĩhũthĩrũo gũteithia andũ agima arĩa mendete kwĩruta Bibilia makĩria. Na tondũ Bibilia nĩ ibuku rĩa mũndũ o wothe, tũrĩ na ma atĩ ithuothe nĩ tũkũgunĩka twathoma maũndũ marĩa ĩtũrutaga, marĩa mangĩtũteithia gũkorũo na gĩkeno kĩa ma.

Ibuku rĩrĩ rĩratwĩra maũndũ marĩa marĩ thĩinĩ wa Bibilia, kuuma rĩrĩa andũ mombirũo na gũthiĩ na mbere. Kĩyo kĩingĩ nĩ gĩkĩrĩtwo nĩguo gũtigĩrĩra atĩ maũndũ macio nĩ maheanwo na njĩra hũthũ ĩrataũkĩka wega na kũngĩhoteka makarũmanĩrĩra kũringana na ũrĩa meekĩkire.

O na kũrĩ ũguo, ibuku rĩrĩ to kwarĩrĩria rĩraarĩrĩria maũndũ marĩa marĩ thĩinĩ wa Bibilia. Ũhoro ũrĩa ũrĩ thĩinĩ o hamwe na mbica ihaarĩrĩirio na njĩra ya kũgucĩrĩria na ĩronania biũ ũrĩa arĩa maarĩrĩirio maaiguaga.

Ibuku rĩrĩ nĩ rĩratũteithia kuona ũrĩa Bibilia ĩrĩ ibuku rĩaragĩrĩria ũhoro wa andũ, arĩa maathĩkagĩra Jehova na arĩa mataamwathĩkagĩra. Na nĩ rĩratũteithia kuona maũndũ marĩa tũngĩĩruta kuumana na cionereria ciao. (Aroma 15:4;  1 Akorintho 10:6) Ibuku rĩrĩ rĩna icigo 14. O gĩcigo kĩrambĩrĩria kũheana maũndũ marĩa tũngĩĩruta na njĩra nguhĩ.

Angĩkorũo ũrĩ mũciari, no mũthome gĩcunjĩ kĩmwe na mwana waku mũcoke mwarĩrĩrie mbica iria irĩ ho. Ningĩ no mũcoke mũthome Maandĩko marĩa monanĩtio thĩinĩ wa gĩcunjĩ kĩu. Teithia mwana waku one ũrĩa maũndũ marĩa athoma thĩinĩ wa gĩcunjĩ mararingana na marĩa athoma thĩinĩ wa Bibilia. Njĩra o ta ĩyo no ĩkorũo na moimĩrĩro mega rĩrĩa ũrateithia mũndũ mũgima ataũkĩrũo nĩ ndũmĩrĩri ya Bibilia.

Tũrehoka atĩ ibuku rĩrĩ nĩ rĩgũteithia andũ arĩa othe marĩ ngoro njega merute kuumana na Kiugo kĩa Ngai, na mahũthĩre maũndũ marĩa mekwĩruta ũtũũro-inĩ wao. Ũndũ ũcio no ũmateithie gũthathaiya Jehova marĩ famĩlĩ-inĩ yake.