សំបុត្រពីគណៈអភិបាល
ជូនចំពោះបងប្អូនជាទីស្រឡាញ់!
ក្នុងនាមជាអ្នកគោរពប្រណិប័តន៍ព្រះយេហូវ៉ា យើងស្រឡាញ់គម្ពីរដែលជាបណ្ដាំរបស់លោក។ យើងជឿជាក់ថាគម្ពីរមានដំណើររឿងប្រវត្តិសាស្ត្រត្រឹមត្រូវ និងមានការណែនាំដ៏គួរឲ្យទុកចិត្ត ព្រមទាំងភ័ស្តុតាងដែលបញ្ជាក់ថាព្រះយេហូវ៉ាស្រឡាញ់មនុស្សទាំងអស់។ (ចម្រៀងសរសើរព្រះ ១១៩:១០៥; លូកា ១:៣; យ៉ូហានទី១ ៤:១៩) យើងចង់ជួយអ្នកឯទៀតឲ្យរៀនអំពីសេចក្ដីពិតដ៏មានតម្លៃក្នុងបណ្ដាំរបស់ព្រះ។ ហេតុនេះ យើងសប្បាយចិត្តបោះពុម្ពសៀវភៅនេះដែលមានចំណងជើងថា «មេរៀនដែលអ្នកអាចរៀនពីគម្ពីរ»។ យើងសូមរៀបរាប់បន្តិចអំពីសៀវភៅនេះ។
សៀវភៅនេះបានចងក្រងជាពិសេសសម្រាប់កូនក្មេង ប៉ុន្តែសៀវភៅនេះក៏អាចជួយមនុស្សពេញវ័យឲ្យរៀនថែមទៀតអំពីគម្ពីរដែរ។ គម្ពីរជាសៀវភៅសម្រាប់មនុស្សគ្រប់រូប។ ដូច្នេះ យើងជឿជាក់ថាអស់អ្នកដែលសិក្សា ឬពិនិត្យមើលឡើងវិញនូវមេរៀនក្នុងសៀវភៅនេះ នឹងមានអារម្មណ៍សប្បាយរីករាយជាមិនខាន។
ដោយផ្អែកលើកំណត់ហេតុគម្ពីរ សៀវភៅនេះប្រាប់អំពីប្រវត្តិសាស្ត្ររបស់មនុស្ស ចាប់តាំងពីការបង្កើតដំបូងមក។ យើងខិតខំអស់ពីសមត្ថភាពដើម្បីបង្ហាញដំណើររឿងក្នុងគម្ពីរ តាមរបៀបដែលច្បាស់ ស្រួលយល់ និងតាមលំដាប់លំដោយ ដែលអាចធ្វើទៅបាន។
សៀវភៅនេះមិនគ្រាន់តែពណ៌នាអំពីកំណត់ហេតុក្នុងគម្ពីរប៉ុណ្ណោះទេ ប៉ុន្តែទាំងមេរៀនទាំងរូបភាពបានត្រូវសម្រិតសម្រាំង ដើម្បីជួយអ្នកអានឲ្យស្រួលស្រមៃឃើញទិដ្ឋភាពរស់រវើក និងអារម្មណ៍របស់បុគ្គលក្នុងគម្ពីរ។
សៀវភៅនេះជួយយើងឲ្យដឹងថា គម្ពីរជាសៀវភៅដែលប្រាប់អំពីមនុស្សផ្សេងៗ ទាំងអ្នកដែលស្ដាប់បង្គាប់ព្រះយេហូវ៉ា ទាំងអ្នកដែលមិនស្ដាប់បង្គាប់លោក។ សៀវភៅនេះក៏មានមេរៀនជាច្រើនដែលយើងអាចរៀនពីគំរូរបស់ពួកគេដែរ។ (រ៉ូម ១៥:៤; កូរិនថូសទី១ ១០:៦) សៀវភៅនេះមាន១៤ផ្នែក។ ផ្នែកនីមួយៗចាប់ផ្ដើមដោយការសង្ខេបសាច់រឿងនៃមេរៀនដែលយើងនឹងរៀន។
បើអ្នកជាឪពុកម្ដាយ អ្នកអាចអានមេរៀនជាមួយនឹងកូន រួចពិភាក្សាអំពីរូបភាព។ បន្ទាប់មក អានខគម្ពីរនៅក្នុងមេរៀន ហើយជួយកូនឲ្យយល់ថាខគម្ពីរទាក់ទងគ្នាយ៉ាងណានឹងមេរៀន។ អ្នកក៏អាចធ្វើដូចគ្នាដែរពេលជួយមនុស្សពេញវ័យ ដើម្បីឲ្យពួកគេស្រមៃឃើញទិដ្ឋភាពកាន់តែច្បាស់ពីកំណត់ហេតុក្នុងគម្ពីរ។
យើងសង្ឃឹមថាសៀវភៅនេះនឹងជួយអស់អ្នកដែលមានចិត្តគំនិតត្រឹមត្រូវ មិនថាក្មេងឬចាស់ទេ ឲ្យរៀនពីបណ្ដាំរបស់ព្រះយេហូវ៉ា ហើយយកមកអនុវត្តក្នុងជីវិតប្រចាំថ្ងៃ។ យ៉ាងនេះ ពួកគេអាចទៅជាសមាជិកក្នុងក្រុមគ្រួសារជាទីស្រឡាញ់របស់ព្រះយេហូវ៉ា ហើយគោរពប្រណិប័តន៍លោកជាមួយនឹងយើង។
ពីបងប្អូនរបស់អ្នក
Governing Body of Jehovah’s Witnesses
(គណៈអភិបាលនៃសាក្សីព្រះយេហូវ៉ា)