Jiphange Jetu ja Kazola:

Mukonda dia kukala tu abhezi a Jihova, tua zolo o Maka mê, o Bibidia. Tuejiia kuila o misoso i tu sanga mu Bibidia ia kidi, i tu bhana itendelesu i tu kuatekesa ku muenhu, i londekesa ue o henda ia Jihova ku athu. (Jisálamu 119:105; Luka 1:3; 1 Nzuá 4:19) Etu tua-ndala kukuatekesa akuetu kuijiia o kidi ki tu sanga mu Mak’â Nzambi. Mukonda dia kiki, kisangu-sangu kia dikota ku mi bhana o divulu didi, Katula Mbote mu Misoso ia Bibidia. Tua-nda mi tangela bhofele ia lungu ni divulu didi.

O divulu didi, a di bhange benge benge phala o ana ndenge. Adiakime a mesena kuijiia dingi o Bibidia, a tena ue ku di tanga. Kuma o Bibidia divulu phala o athu oso, sé phata etuenioso tua-nda katula mbote, mu kutanga o divulu didi, dia-nda tu kuatekesa ue kuzediua ku muenhu.

Mu kutanga o misoso ia Bibidia, o divulu didi di tu tangela o misoso ia athu tundé ku dimatekenu dia ixi katé ku hádia. Tua bhange ioso, phala ku mi londekesa o misoso ia Bibidia, mu ukexilu ua bhebhuluka a tena ku u tendela kiambote, kala ki ia bhiti.

Mu kidi, o divulu didi ki dia misoso ngó kana, maji di zuela ima iavulu. O madisá ni jifoto, a ji bhange phala kubhana nguzu mu misoso ia Bibidia, ni ku kulondekesa kiebhi kia divu o athu ala mu jifoto.

O divulu didi di tu kuatekesa kumona kiebhi o Bibidia izuela ia lungu ni athu a belesela Jihova, ni a kambe ku mu belesela. Kiki ki tu kuatekesa kukatula madisá mu phangu iâ. (Loma 15:4; 1 Kolindo 10:6) O divulu didi diala ni 14 a jimbandu. Mu dimatekenu dia jimbandu, tu sanga-mu o madisá u tu tena kudilonga.

 Se u tata mba u mama, u tena kutanga o madisá ni tuana tuê, ni kua lombolola o jifoto. Kiiadi kienu mu tena kutanga o jimbandu ja Bibidia ja lungu ni musoso u mua mu dilonga. Kuatekesenu o tuana tuenu, ku tendela o misoso ia mu dilonga ni ku i sokesa ni ia Bibidia. Mu tena ue ku bhanga kiki, mu kulonga o Bibidia ni adiakime.

Tua mu kingila kuila o divulu didi, di kuatekese ió ala ni muxima ua lenduka​—minzangala ni adiakime​—​mu kudilonga o Mak’â Nzambi, phala kukumbidila o milongi ia Bibidia ku mienhu iâ. Mu kubhanga kiki, ene a-nda tena ue kubhanga mbandu ia muiji ua Nzambi.