Ku Bakwetu Bena Kilishitu:

Byo tuji bapopweshi ba Yehoba, twatemwa bingi Mambo anji, Baibolo. Twashiinwa kuba’mba Baibolo witubuula bintu bya kine byamwekele kala, witukwasha kuyuka bya kwikala kabiji witukwasha ne kuyuka’mba Yehoba watemwa bingi bantu bonse. (Salamo 119:105; Luka 1:3; 1 Yoano 4:19) Tukebesha bingi kukwasha bantu kuyuka bukine buji mu Mambo a Lesa. Onkao mambo, twatemwa bingi kulupula uno buku wa kuba’mba, “Bintu byo Mwakonsha Kufunda mu Baibolo.” Pano lekai twimubule biji mu uno buku.

Banyike bo bene bo twanembela uno buku. Pano bino, nangwatu bakulumpe bakeba kuyuka byavula biji mu Baibolo bakonsha kumwingijisha. Baibolo bamunembela bantu bonse. Onkao mambo, mafunde aji mu uno buku akonsha kwitulengela atweba bonse kwikala na lusekelo.

Mu uno buku muji mashimikila a mu Baibolo aamba pa bantu bajingako kufumatu ku ntendekelo. Mashimikila aji mu uno buku beanemba mu jishinda japeela kumvwa, kabiji mu ndonda mwamwekejilenga bintu.

Uno buku kechi mujitu mashimikila a mu Baibolo kwapwa ne. Muji ne bipikichala ne byambo byo banemba mu jishinda ja kukwasha bantu kumvwisha mashimikila a mu Baibolo ne kuyuka bintu byapichilengamo bobo bantu.

Uno buku usakwitukwasha kuyuka’mba Baibolo ke buku waamba pa bantu bakookelanga Yehoba ne babulanga kumukookela. Kabiji usakwitukwasha kufunjilako ku bintu byo bapichilemo. (Loma 15:4; 1 Kolinda 10:6) Uno buku uji na bipungu 14. Ku ntendekelo ya kipungu kyonse, banembako bishinka bijimo byo twakonsha kufunjilako.

 Inge mwi bansemi, mwakonsha kutanga na mwanenu kipungu ne kwisamba pa bipikichala bijimo. Umvwe mwapwisha kuba bino, tangai Binembelo paimena mutwe ye mubena kwisambapo. Kwashai mwanenu kumvwisha bintu byo atanga mu Baibolo kwingijisha uno buku. Abino byo byo mwakonsha kuba inge mubena kukwasha mwana wakoma kumvwisha byo atanga mu Baibolo.

Twaketekela kuba’mba uno buku usakukwasha bantu bonse, banyike ne bakulumpe kumvwisha byo batanga mu Mambo a Lesa ne byo bafwainwa kwingijisha byo babena kufunda mu bwikalo bwabo. Kino kikebalengela nabo kukeba kwingijila Lesa.