Chaaŋaa Naa Laalaŋnda Lawosɛ:

Naŋ cho Chɛhowa piɛiyo wa, ŋ kaala Diom ndɔɔ Baabuiyo. Ŋ laalaŋ kɛsɛ maa bundɔŋ cho leniŋ ndoŋ cho tonya, nduyɛ o ke naa nɛi chɔmaa o yoomoo niŋ. O chɔm naa kpendekele mɛɛ kpɛ Chɛhowa kaala waŋnda chieeya yɛ. (Sam 119:​105; Luku 1:​3; 1 Chɔŋ 4:​19) Ŋ nɔ yeemɛi tau le wanaa cheleŋ malaa ma pɛɛku tonyala sɔvɛla cho o Diom Mɛlɛkaa niŋndaŋ. Le saboo hoo, ŋ cho a kɔl kɛndɛ le yauwo hoo solioo. Suɛi lebolle aa, “Pɛɛku a Bundɔŋ Cho o Baabuiyo Niŋndoŋ Okɔɔ.” Ŋ yeema miŋ chɔm nya chobe a yauwo hoo okɔɔ.

O kpeekpei niŋ, le chuaambuaa yauwo hoo toosiaŋ ni. Kɛ o wa bɛɛ lende, ŋ soliŋ ndu vɛlɛ kpeku le kaasoŋaa nɔ yeemɛi le ma chɔɔlu sina a Baabuiyo okɔɔ wa malaa. Le mɛɛ Baabuiyo cho le wana o wana yɛ, naa kpou nɔla miŋ sɔla tɔnɔɔ leniŋ te ŋ wa pɛ sɔɔŋ cho leniŋ ndoŋ pɛɛkoo. Nduyɛ sɔɔŋ muŋ mala naa miŋ wa a nyaale kpeekpeiyo.

Yauwo hoo soo a bundɔŋ cho o Baabuiyo niŋndoŋ okɔɔ, chɔŋ a boondii Mɛlɛka toosiaa wanachioo ve haaa huŋ bii a hau. Miŋ kindiŋ o nɛi o nɛi niŋ le bundɔŋ cho o Baabuiyo niŋndoŋ tɛɛsiaa walaŋ, nduyɛ miŋ wa tɛtɛlɛ. Okoŋ, miŋ poonyiaa muŋ o lepula a mɛɛ sɔɔŋ yɔŋnuŋ yɛ.

Yauwo hoo suu ko a bundɔŋ Baabuiyoŋ okɔɔ le suɛi leŋ te. Kɛ mɛɛ nda poonyiaa ndu yɛ, vɛlɛ a fotueila cho leniŋndaŋ la mala naa le sinaa maa sɔɔŋ kpeekpeiyoŋ ŋ cho ni, a mɛɛ wanaa ŋ soo okɔɔ wa ndaa sinaŋ yɛ.

Yauwo hoo mala naa le sinaa wanaa Baabuiyo soo a nda okɔɔ wa, wanaa ndaa tuei Chɛhowa diomnda, a wanaa tui ndu diom te wa. Nduyɛ o mala naa le miŋ pɛɛku nyɛ o tamaseliila ndalaŋ niŋ. (Luomaŋnda 15:​4; 1 Kɔliŋtiaŋ 10:​6) Yauwo hoo nɔ buŋgaŋ 14. O kandɔŋ buŋgɛi kɛ kɛ, mbo suaa chobe a sɔɔŋ kuluŋ naŋ cho pɛɛku o buŋgɛi keŋ niŋndoŋ okɔɔ.

 Te o yɔŋ pɛ aa kala chuaa ŋ cho ni, la veelu diomndaŋ o pɛllo niŋ nya po numndo ɔɔ chua numndo latulu, mi la suukaŋ a fotueila cho leniŋ ndaŋ okɔɔ. Okoŋ, mi la veelu diomndaŋ o bolii Baabui pɛl koŋ tɔlnuŋ choo ve. Mala po numndo ɔɔ chua numndo, mbo che chɛlaŋ cho Baabuiyo tɛɛŋ, a nyɛ cho o pɛl koŋ niŋndo. A tual vɛlɛ nɛi pilɔɔ hoo kɔɔli, te a wa pɛ kaasoŋnɔɔ malaa le mbo sina a yooŋgu cho o Baabuiyo niŋndo okɔɔ.

Ŋ nɔ tiindaŋndo maa yauwo hoo cho wanaa nɔ yeemɛiya kpou mala, chuaambɔ ni, kaasoŋnɔ ni, le ma pɛɛku Diom Mɛlɛkaa, nduyɛ ma dɔu ndu o wali niŋ o yoomula ndalaŋ niŋ. O mɛɛlulaŋ, mi nda bɛɛ sɔɔŋguu yuŋgu Mɛlɛka kaala wo choo le ndu piɛiyo.