Kwa Mpangi Zeto Zazolwa:

Wau vo tu selo ya Yave, tutoma zolanga e Diambu diandi. Tuna ye ziku vo tusansu tuna muna Nkand’a Nzambi twakieleka. E Diambu dia Nzambi divuidi malongi mamfunu malenda kutusadisa muna zingu kieto. Disonganga mpe o zola kwa Yave muna wantu. (Nkunga 119:105; Luka 1:3; 1 Yoane 4:19) Luzolo lweto i sadisa akaka kimana bazaya malongi mamfunu mena muna Diambu dia Nzambi. Muna kuma kiaki, tuna ye kiese kia vaikisa nkanda wau una yo ntu a diambu vo “Mambu Tulenda Longoka Muna Nkand’a Nzambi.” Yambula twanuzayisa maka mambu mena mu nkanda wau.

O nkanda wau wakubikilu mu kuma kia yingiana-ngiana. Kansi, ulenda mpe sadilwa mu sadisa ambuta ana bena ye tima dia longoka mayingi mu kuma kia Nkand’a Nzambi. Vana ntandu, wau vo Nkand’a Nzambi wa wantu awonso, ka lukatikisu ko vo yeto awonso tuvua nluta muna fimpa malongi ma nkanda wau, kadi malenda kutusadisa mu kala ye zingu kiakiese.

O nkanda wau uyikanga lusansu lwa wantu tuka kuna lubantiku lwa nsema. Ngolo kikilu tuvangidi mu zingula tusansu twatu twa Nkand’a Nzambi mu mpila yakiá ye yaleboka muna mandandani mavangamena e mambu.

Kansi, nkanda wau ke uzingulanga kaka tusansu twa Nkand’a Nzambi ko. E mambu ye mafoto makubikilu mu mpila ina ilenda sadisa atangi mu kuyisia muna mambu betanganga yo bakula una bamonanga awana beyikwanga mu tusansu twatu.

O nkanda wau ukutusadisa mu bakula vo Nkand’a Nzambi wantu a mpila zawonso uyikanga, awana balemvokela Yave ye awana balembi kunlemvokela. Ukutukasakesa mu vava mana  tulenda longoka muna mbandu au. (Roma 15:4; 1 Korinto 10:6) Nkanda wau wavambulwa mu kunku 14. Kuna lubantiku lwa konso kunku, kuna ye mvovo mia lusunzulu misonganga mana tulenda longoka.

Avo u se yovo ngudi, olenda tanga longi dimosi yo mwan’aku yo fimpa e fwaniswa. I bosi, yeno awole nulenda tanga sono ya Nkand’a Nzambi ibongelo e longi. Sadisa mwan’aku kabakula vo mawonso ketanganga mu nkanda wau muna Nkand’a Nzambi matukidi. Tulenda vanga diau dimosi vava tusadisanga ambuta mu zaya e nsangu zina mu Nkand’a Nzambi.

Tuna ye vuvu vo nkanda wau usadisa awonso akwa ntima miambote, kiakala aleke yovo ambuta, mu longoka Diambu dia Nzambi yo sadila mana belongoka muna zingu kiau. Muna mpila yayi, oyau mpe balenda baka e nzengo za kunsambila entwadi yo nkangu andi azolwa.