Haꞈ ve awˬ viˉ awˬ nyi˗oˬ:

Ngaˬ hui Yaˬhoˉvaˬ htaꞈ oˉ kʼoˍ pui ve chaw hpehꞈ pa taw, Liꞈ hpu hkʼaw yawˇ maˍ laˇ ve tawˇ hkawˇ htaꞈ haꞈ ve yoˬ. Liꞈ hpu hkʼaw teˇ co˗e peuˬ, teˇ co˗e ve awˬ lawn cawˬ ve htaꞈ ngaˬ hui yonˍ gʼa ve yoˬ. Daꞈ jaˇ ve beˆ maˍ laˇ hkawˇ a shaꞈ teꞈ kuiˬ hkʼaw yuˬ yehˇ gʼa ve cawˬ ve yoˬ. Leh Yaˬhoˉvaˬ chaw yaˇ teˇ gʼaˇ le le htaꞈ haꞈ ve shaˉ hkiˆ cawˬ ve yoˬ. (Chiˇ mvuh ve liꞈ 119:105; Luˉkaꞈ 1:3; 1 Yoˇhanˬ 4:19) Liꞈ hpu hkʼaw awˬ hpfuhˇ hkʼaˆ jaˇ ve awˬ tehˬ shu henˇ tuˬ ngaˬ hui ga piˇ gaˇ ve yoˬ. Liꞈ kʼoˆ chi ve teˇ kʼoˆ awˬ meh ngaˬ hui yanˍ tawˆ ve lehˬ, ‘Liꞈ hpu hkʼaw ve awˬ lawn ngaˬ hui henˇ ve.’ Liꞈ kʼoˆ chi htaꞈ caˉ daꞈ ve ngaˬ hui a ciˉ kʼoˆ maˍ laˇ gaˇ ve yoˬ.

Ngaˬ hui liꞈ chi teˇ kʼoˆ yaˇ ehˉ awˬ pon te taˍ ve yoˬ. Yaꞈ hkʼaˇ, chaw mawˇ Liꞈ hpu hkʼaw hkʼa dehꞈ shiˍ gaˇ ve chaw kaꞈ awˬ bon gʼa ve yoˬ. Liꞈ hpu lehˬ teˇ gʼaˇ le le awˬ pon hpehꞈ ve yoˬ. Liꞈ chi teˇ kʼoˆ htaꞈ henˇ ve chaw teˇ gʼaˇ le le lehˬ, ha lehˬ jaˇ tuˬ yoˬ tehꞈ ngaˬ hui yonˍ gʼa ve yoˬ.

Liꞈ hpu hkʼaw bvuhꞈ taˍ ve hkʼe leˇ chaw yaˇ ve yehˬ kʼa htaꞈ tanˬ hpanˍ htaˇ ve awˬ lawn, liꞈ chi teˇ kʼoˆ hkʼaw hpehꞈ laˬ ve awˬ lawn kʼoˆ maˍ laˇ taˍ ve yoˬ. Liꞈ hpu hkʼaw ve awˬ lawn hkʼa tawˍ lehˆ mawˬ gʼa tuˬ, hkʼa sha sha˗ehˬ na gʼatuˬ, leh teˇ caˉ peuˬ teˇ caˉ te gʼa tuˬ ve awˬ yanˇ, chi ve teˇ hpaˍ ngaˬ hui coˇ caˇ leh te taˍ ve yoˬ.

Liꞈ chi teˇ kʼoˆ lehˬ aˬ sho˗eˬ htaˇ ve awˬ lawn ceh tiˉ kʼoˆ maˍ laˇ ve maˇ heˆ. Yaꞈ hkʼaˇ, liꞈ chi teˇ kʼoˆ gʼaw ve chaw Liꞈ hpu hkʼaw ve chaw gʼa hpuˇ ve hkʼe leˇ dawˇ tuˬ, yawˇ hui ve awˬ lawn coˇ caˇ leh henˇ tuˬ, daꞈ ve awˬ han teˇ hpaˍ dawˇ nyi leh keu taˍ ve yoˬ.

Liꞈ chi teˇ kʼoˆ Liꞈ hpu hkʼaw ve chaw maˇ maˇ ve awˬ lawn ngaˬ hui mawˬ tuˬ ga laˇ ve yoˬ. Yaˬhoˉvaˬ hkawˇ na ve chaw leh maˇ na ve chaw awˬ lawn cawˬ ve yoˬ. Leh ngaˬ hui yawˇ hui ve awˬ lawn laiˉ law henˇ gʼa ve yoˬ. (Roˉmaꞈ 15:4; 1 Kawˇrenˍhtuˆ 10:6) Liꞈ chi teˇ kʼoˆ 14 tawn cawˬ ve yoˬ. Ngaˬ hui henˇ tuˬ ve a yeˇ uiˍ ve awˬ lawn teˇ tawn teˇ tawn chi suhˉ˗ehˬ kʼoˆ maˍ laˇ taˍ ve yoˬ.

 Awˬ pa awˬ e hpehꞈ ve chaw˗oˬ, nawˬ ve yaˇ geh teˇ lawn peuˬ teˇ lawn gʼaw leh awˬ han htaꞈ caˉ daꞈ ve tawˇ yaw daꞈ sheˍ. Peuˬ hkʼawꞈ nawˉ awˬ hawˉ lo cawˬ ve Liꞈ hpu awˬ tawn gʼaw leh Liꞈ hpu awˬ tawn oˇ ve awˬ tawn hkʼaw ve awˬ lawn htaꞈ hkʼaˬ hkʼe caˉ daꞈ ve yaˇ na gʼa tuˬ maˍ piˇ sheˍ. Nawˬ kaꞈ awˬ hkʼaˇ chi yehˇ leh chaw mawˇ Liꞈ hpu hkʼaw ve awˬ lawn hkʼa peu˗eˬ na gʼa tuˬ maˍ piˇ sheˍ.

Daꞈ ve awˬ ceuˬ htaꞈ haꞈ ve chaw teˇ gʼaˇ le le liꞈ chi teˇ kʼoˆ ga piˇ gʼa ve tehꞈ ngaˬ hui dawˇ law ve yoˬ. Yaˇ ehˉ maˇ kʼoˆ chaw mawˇ maˇ kʼoˆ Gʼuiˬ sha ve tawˇ hkawˇ henˇ leh a shaꞈ teꞈ hkʼaˇ hkʼaw yuˬ yehˇ gʼa ve yoˬ. Nawˬ kaꞈ Yaˬhoˉvaˬ ve yehˬ kʼa hkʼaw teˇ gʼaˇ hpehꞈ la leh yawˇ htaꞈ oˉ kʼoˍ teˇ geh pui la sheˍ.