Kwa Bakreste ka Luna:

Ka kuba balapeli ba Jehova, lwalata Linzwi lahae, yona Bibele. Lunani buikolwiso bwa kuli Bibele inani litaba zakale zenepahezi, zekona kulutusa, ni zebonisa kuli Jehova walata batu. (Samu 119:105; Luka 1:3; 1 Joani 4:19) Lutabela kutusa babañwi kuituta niti ya mwa Linzwi la Mulimu. Kabakaleo, lutabile kuzwisa buka ye, yenani toho ya taba yeli, “Zemukona Kuituta Mwa Bibele.” Kashe lumitaluseze ka bukuswani litaba zeñwi ka za buka ye.

Buñata bwa litaba zefumaneha mwa buka ye lilukiselizwe kutusa banana. Nihakulicwalo, hape yakona kuitusiswa kutusa babahulu babatabela kuituta zeñata ka za Bibele. Bakeñisa kuli Bibele ilukiselizwe kutusa mañi ni mañi, kaufelaa luna lukatusiwa ka kunyakisisa lituto zefumaneha mwateñi, ili zekona kulutusa kuba ni tabo.

Ka kuitusisa litaba za mwa Bibele, buka ye italusa makande a batu kuzwa kwa makalelo a pupo kuto fita mwa linako zaluna. Nekuezizwe buikatazo kuli litaba za mwa Bibele zefumaneha mwa buka ye likone kuba zebunolo ni zeutwisiseha, mi litalusizwe kulikana ni mone liezahalezi.

Nihakulicwalo, buka ye haitalusi feela litaba za mwa Bibele. Litaba ni maswaniso aitusisizwe mwa buka ye, lilukisizwe ka nzila yekona kutusa mubali kuutwisisa hande litaba za mwa Bibele mi libonisa mone baikutwela batu bababulezwi mwa Bibele.

Hatiso ye ilutusa kuziba batu bababulezwi mwa Bibele, ili bane bautwa Jehova ni bane basa muutwi. Mi ilususueza kuituta kwa mitala yabona. (Maroma 15:4; 1 Makorinte 10:6) Buka ye, ialuzwi  mwa likalulo ze 14. Kwa makalelo a kalulo ni kalulo kunani litaba ka bukuswani zebonisa lituto zelukona kuituta.

Haiba mu bashemi, mwakona kubala tuto ni mwanaa mina ni kunyakisisa maswaniso azamaelela ni tuto yeo. Mi hamulaho, mwakona kubala hamoho litimana za mwa Bibele foitomile tuto yemuli ku yona. Mutuse mwanaa mina kulemuha swalisano ye mwahalaa litaba zabala mwa Bibele ni zaituta mwa buka. Mwakona kuitusisa muezezo oswana hamutusa yomuhulu kuli azibe litaba za mwa Bibele.

Lunani sepo ya kuli hatiso ye ikatusa batu kaufela babanani lipilu zende, banana ni babahulu kuituta Linzwi la Mulimu ni kulisebelisa mwa bupilo bwabona. Kabakaleo, ni bona bakona kumulapela sina babañwi ba lubasi lwahae lolunde.