Bana betu basuibue:

Bu mutudi batendeledi ba Yehowa, tudi banange Bible Dîyi diende. Tudi batuishibue ne: didi ditulondela malu a kale anu muvuawu, ditupesha mibelu ya kueyemena bua kuikala ne nsombelu muimpe, ne ditupesha bijadiki bimpe bia ne: Yehowa mmunange dîku dia bukua bantu. (Misambu 119:105; Luka 1:3; 1 Yone 4:19) Tudi ne dijinga dikole dia kuambuluisha bantu bakuabu bua balonge malu malelela a mushinga adi mu Dîyi dia Nzambi. Ke bualu kayi tudi ne disanka dia kupatula mukanda eu: “Malongesha audi mua kupeta mu Bible.” Anyishayi tuakule kakese bua mukanda eu.

Bana ke badibu batambe kuenzela mukanda eu. Kadi udi kabidi mua kuambuluisha bakulumpe badi basue kulonga malu a mu Bible a bungi. Bu mudi Bible mukanda wa bantu bonso, kakuyi mpata nebituambuluishe tuetu bonso bua kupinganyina malongesha adimu adi mua kutuambuluisha bua kuikala ne disanka dilelela.

Mu mukanda eu mbangate miyuki ya mu Bible bua kulonda malu a dîku dia bukua bantu kubangila anu ku bufuki. Mbadienzeje bikole bua kufunda miyuki ya mu Bible mu mushindu mupepele udi umvuika bimpe, ne bua kulonda malu muvuawu menzeke enda alondangana pavuaku mushindu.

Kadi mukanda eu kawena anu ulonda miyuki ya mu Bible tshianana to. Malu adibu bafundamu ne bimfuanyi mbienza mu mushindu wa ne: muntu amone miyuki ya mu Bible bu idi yenda yenzeka ne amone muvua bantu badibu bakuile badiumvua.

Mukanda eu udi utuambuluisha bua kumona mudi Bible muikale mukanda udi wakula bua bantu, bantu bavua batumikile Yehowa ne bavua kabayi bamutumikile. Udi utusaka kabidi bua kupetela malongesha ku bilejilu biabu. (Lomo 15:4; 1 Kolinto 10:6) Mukanda eu mmukosolola mu bitupa 14. Ku ntuadijilu kua tshitupa tshionso badi bakula mu tshikoso bua amue malongesha atudi mua kupeta.

 Wewe muikale muledi, udi mua kubala dilongesha kampanda ne muanebe ne kuyukila nende bua bimfuanyi bidi muaba au. Pashishe nudi mua kubala mvese ya mu Bible idibu bangatshile dilongesha adi. Ambuluisha muanebe bua amone diumvuangana didi pankatshi pa malu adiye ubala mu Bible ne dilongesha adi. Tudi mua kuenza bia muomumue patudi tuambuluisha muntu mukulumpe bua kumvua lungenyi lunene lua mukenji udi mu Bible.

Tudi batekemene ne: mukanda eu newambuluishe bantu bonso, bana ne bakulumpe, badi ne muoyo wa kulonga Dîyi dia Nzambi ne kutumikila malongesha adimu mu nsombelu wabu. Bualu ebu budi mua kubambuluisha bua bobu pabu batendelele Nzambi bu bena mu dîku dia bantu badiye munange.