Jokristo Wetewa ma Wageno:

Nikech wan jotich Jehova, wahero Muma ma en buk moting’o Wachne. Wan gadier chuth ni Muma wacho adier e wi gik ma ne otimore chon, kendo olero wechego adimba. Gik ma wasomo e iye gin gik ma konyowa e ngimawa, kendo gimiyo waneno gadier kaka Nyasaye ohero dhano. (Zaburi 119:105; Luka 1:3; 1 Johana 4:19) Dwaher ahinya konyo jomamoko mondo gipuonjre adiera ma yudore e Wach Nyasaye. Nikech mano, wamor ahinya loso bugni. Iluonge ni, Weche Minyalo Puonjori e Muma. We wanyisu e yo machuok kaka bugni chalo.

Bugni olos ahinya-ahinya ne nyithindo matindo. Kata kamano, inyalo ti kode bende e puonjo joma dongo ma nigi gombo mar ng’eyo Wach Nyasaye e yo momedore. To nikech ne ondik Muma ne ji duto, wan gadier ni ka inono weche manie bugni, ibiro bedo gi mor madier.

Bugni tiyo gi weche miwuoyoe e Muma e leronwa kaka ngima dhano osebet nyaka ne Nyasaye chue dhano mokwongo. Bende, oler wechego e yo ma winjore mayot, kendo otem chan-gi ka luwore gi kaka ne gitimore, moro bang’ machielo.

Mopogore gi lero kaka gik moko ne otimore, weche motigo e bugni kaachiel gi pichni oket e yo ma konyowa neno e pachwa kaka gik moko notimore gadier, kendo ginyiso kaka joma iwuoyo kuomgi ne winjo e chunygi.

Bugni olos e yo ma konyowa ng’eyo ni Muma wuoyo kuom joma ne nitie gadier, kendo moko ne owinjo Nyasaye, to moko ne ok owinje. Okonyowa fwenyo puonj ma wanyalo yudo kuomgi. (Jo-Rumi 15:4; 1 Jo-Korintho 10:6) Bugni opog iye e kidienje 14, tiende ni Kare Mokwongo nyaka Kare mar 14. Kama kidieny ka kidieny chakoree oketie puonj madongo ma yudore e sula buora ma luwe.

 Ka in janyuol, inyalo somo sula moro gi nyathini, kae to unono pichni ma yudore kanyo. Bang’ mano, unyalo somo ndiko moket e giko sulano. Kony nyathini mondo one ni gik mopuonjore e sulano owuok e Muma. Joma dongo bende inyalo puonj gi bugni e yo ma kamano.

Wan gi geno ni bugni biro konyo ji duto ma gombo ng’eyo yore Nyasaye mondo ginon Wach Nyasaye kendo giti gi puonj ma giyudo e ngimagi, bed ni gin joma tindo kata joma dongo. Mano biro miyo gin bende giti ne Jehova Nyasaye.