Aqeye erman at qkʼujlabʼile kyiʼje:

Aqoʼ in qo kʼulin te Jehová kʼujlaʼn Xjan Uʼj quʼn. Qʼuqli qkʼuʼj tiʼj qa atz toj tkuʼx txʼolbʼabʼil tzʼaqlixix, qe nabʼil jaku che onin qiʼj toj qanqʼibʼil ex qe yekʼbʼil tiʼj tkʼujlabʼil Jehová at kyiʼj ja xjal (Salmo 119:105; Lucas 1:3; 1 Juan 4:19). Aju qajbʼil tuʼn tbʼant quʼn, aju tuʼn qonin kyiʼj txqantl tuʼn tel kynikʼ kyiʼj xnaqʼtzbʼil axix tok tkuʼx toj Tyol Dios. Tuʼntzunju, in qo tzalaje tuʼn t-xi qyekʼine aju uʼj lu kyeye: Qe xnaqʼtzbʼil jaku jatz wiʼne toj Tyol Dios. Qajbʼile tuʼn t-xi qqʼamaʼne junjun tqanil kyeye tiʼj uʼj lu.

Ma kubʼ bʼinchaʼn uʼj lu kye kʼwaʼl. Noqtzun tuʼnj, ax ikx jaku tzʼajbʼen kye xjal ma che chʼiy aʼyeju kyaj tuʼn tel mas kynikʼ tiʼj Tyol Dios. Ex tuʼnju bʼinchaʼn Tyol Dios kye kykyaqil xjal, ax tok che onil qeju txʼolbʼabʼil lu qiʼj aj qxnaqʼtzan kyiʼj ex jaku kanet axix tok tzalajbʼil quʼn.

In tzaj tqʼamaʼn uʼj lu aju txʼolbʼabʼil kyiʼj xjal atxix tej kybʼant tiʼchaq tuʼn Dios, ik tzeʼn tkuʼx toj Xjan Uʼj. Ma tzʼok tilil tuʼn kyxi chikʼbʼet txʼolbʼabʼil lu toj jun tten nya kwest tuʼn tel qnikʼ kyiʼj, ax ikx ma tzʼok tilil tuʼn kykubʼ qʼet toj ttxolil ik tzeʼn e ikʼ qe tiʼchaq.

Aju uʼj lu nya oʼkx in tzaj tqʼamaʼn aʼyeju txʼolbʼabʼil in che jatz toj Tyol Dios. Ma che bʼaj bʼinchaʼn yol ex qe tilbʼilal tuʼntzun tok qʼet kyoklen txʼolbʼabʼil ma che jatz toj Xjan Uʼj ex tuʼn tel nikʼbʼaj tiʼjju kubʼ kynaʼn qe xjal in yolin txʼolbʼabʼil kyiʼj.

In qo tzaj tonin uʼj lu tuʼn tel qnikʼ tiʼj qa aju Tyol Dios jun uʼj in yolin kyiʼj xjal: aʼyeju e bʼin te Jehová ex aʼyeju mintiʼ e bʼin. Ax ikx in nonin qiʼj tuʼn tjatz qiʼn tbʼanel xnaqʼtzbʼil kyiʼj techel kubʼ kyqʼoʼn junjun xjal (Romanos 15:4; 1 Corintios 10:6). At 14 kʼloj xnaqʼtzbʼil toj uʼj lu. Aj t-xi tzyet junjun, at chʼin tqanil tiʼj junjun xnaqʼtzbʼil jaku tzʼel qnikʼ tiʼj.

 Qa ateʼ teya tkʼwaʼl, jaku jaw tuʼjina jun xnaqʼtzbʼil junx kyukʼil ex jaku che yoline kyiʼj techel. Yajxitl, jaku jaw kyuʼjine qe taqikʼ Tyol Dios jatumel xjatz xnaqʼtzbʼil. Jaku tzʼonina tiʼj tkʼwaʼla tuʼn tok tmojbʼaʼn aju in jaw tuʼjin toj Tyol Dios tukʼilju xnaqʼtzbʼil in tzaj t-xnaqʼtzaʼn junjun txʼolbʼabʼil toj uʼj. Ax tumel lu jaku tzʼajbʼen tuʼn t-xi onit jun xjal ma chʼiy tuʼn tel tnikʼ tiʼjju tqanil in tzaj tqʼamaʼn Tyol Dios.

Qajbʼile tuʼn tonin uʼj lu kyiʼj xjal at jun tbʼanel kyanmi, ik tzeʼn qe kuʼxun ax ikx qeju ma che tijen tuʼn tel kynikʼ tiʼj Tyol Dios ex tuʼn tkubʼ kyqʼoʼn toj xnaqʼtzbʼil toj kyanqʼibʼil aju in tzaj tqʼamaʼn. Ax ikx kye jaku che kʼulin te Jehová ex jaku che ok te tmajen.