Nou Bann Frer ek Ser:

Nou, bann adorater Zeova, nou kontan so Parol, Labib. Nou sir ki Labib li exakt an rapor avek listwar, li donn bann bon konsey dan tou domenn nou lavi, ek li donn bann prev lamour ek santiman ki Bondie ena pou bann imin. (Psom 119:105; Lik 1:3; 1 Zan 4:19) Nou vremem anvi ed lezot pou konn bann verite ki dan Parol Bondie ek ki ena enn gran valer. Se pou sa rezon-la ki Komite Santral inn bien kontan pou pibliye sa liv-la: “Bann Leson To Kapav Aprann dan Labib.” Les nou donn zot enn ti avangou sa liv-la.

Sa liv-la inn ekrir sirtou pou bann zanfan. Selman, li kapav osi ed bann adilt ki anvi konn plis lor Labib. Labib li pou tou dimounn. Alor, nou tou nou pou gagn bann bienfe kan nou get bann leson ki ena ladan. Sa bann leson-la kapav ed nou pou ki nou vremem ere dan lavi.

Sa liv-la rakont zistwar bann imin depi kreasion. Nou finn fer bann zefor pou prezant sa bann zistwar-la dan enn fason ki sinp, kler, ek otan ki posib dan lord ki sa bann levennman-la inn deroule.

Selman, sa liv-la pa zis rakont bann zistwar ki ena dan Labib. Fason ki’nn ekrir sa liv-la ek bann zimaz ki ena ladan, fer sa bann zistwar Biblik la vinn vivan ek montre bien santiman ki sa bann personaz-la ti ena.

Sa liv-la pou montre twa ki Labib se enn liv ki koz lor bann dimounn ki’nn obeir ouswa dezobeir Zeova, ek li pou ed twa tir bann leson ar zot lexanp. (Romin 15:4; 1 Korintien 10:6) Dan sa  liv-la, ena 14 seksion. Dan koumansman sak seksion, ena enn rezime bann leson ki to kapav aprann.

Si to enn papa ouswa enn mama, to kapav lir enn zistwar avek to zanfan ek koz lor bann zimaz ki ena enn lien ar sa zistwar-la. Apre sa, zot kapav lir ansam bann verse Labib kot sa zistwar-la sorti. Ed to zanfan pou fer enn lien ant seki li’nn lir dan Labib ek leson ki ena dan sa zistwar-la. Sa metod-la kapav enn bon metod osi pou ed enn adilt gagn enn lide zeneral mesaz ki ena dan Labib.

Nou espere ki sa liv-la pou ed tou bann dimounn sinser, zenn ek vie, pou tir bann leson ar Parol Bondie ek pou met zot an pratik dan zot lavi. Lerla, zot pou kapav ador Zeova ek form parti dan so fami, ki Li bien kontan.