Yokwe Kom̦ Ro Jeim im Jatim:

Kõnke jej kabuñ ñan Jeova, jej yokwe im kaorõk naan ko an ak Baibõl̦ eo. Jej lukkuun tõmak bwe elukkuun jim̦we im m̦ool bwebwenato ko ie, im elõñ naanin kakapilõk ko ie me remaroñ jipañ kõj ilo mour ko ad. Naan ko ie rej bareinwõt kaalikkar an Jeova lukkuun kaorõk im yokwe baam̦le ko. (Sam 119:105, UBS; Luk 1:3; 1 Jon 4:19) Kõmij lukkuun kõn̦aan jipañ ro jet bwe ren jel̦ã kõn katak ko rem̦ool rej pãd ilo Baibõl̦ eo. Kõn men in, el̦ap am kar m̦õn̦õn̦õ in kõm̦m̦ane bok in etan, “Katak jãn Bwebwenato ko ilo Baibõl̦.” Kõm naaj kõmel̦el̦eik kom̦ jidik kõn bok in.

Kar kõm̦m̦ane bok in el̦aptata ñan ajri ro. Ak emaroñ bareinwõt jipañ rũtto ro me rekõn̦aan kal̦apl̦o̦k aer jel̦ã kõn kobban Baibõl̦ eo. Innem kõnke Baibõl̦ eo ej juon bok ñan armej otemjej, ejjel̦o̦k pere bwe kõj aolep jenaaj bõk tokjãn jãn ad ãliji katak ko ie ñan jipañ kõj bwe jen lo m̦õn̦õn̦õ eo em̦ool.

Bok in ej kwal̦o̦k kõn bwebwenato in armej ro ilo Baibõl̦, jino jãn kar jinoin kõm̦anm̦an lal̦ in m̦aantak. Kar kõm̦m̦ane bok in ilo juon wãween elukkuun alikkar im pidodo ñan mel̦el̦e. Im bareinwõt kar kõllaajraki bwebwenato ko ie ekkar ñan tõre ko me rar wal̦o̦k.

Bõtab, bok in ejjab baj kwal̦o̦k wõt kõn bwebwenato ko jãn Baibõl̦. Kar kõm̦m̦an bwe kõmel̦el̦e ko im pija ko ilo bok in ren jipañ ro rej riiti ñan pijaikl̦o̦k bwebwenato ko ilo l̦õmn̦ak ko aer, im bwe ren maroñ mel̦el̦e kõn eñjake ko an kar armej ro ilo Baibõl̦.

Bok in ej jipañ kõj ñan kile bwe Baibõl̦ ej juon bok me ej kwal̦o̦k kõn bwebwenato in armej ro rar pokake Jeova im ro rar jab pokake. Im ej bar jipañ kõj ñan l̦õmn̦ak kõn ta ko jemaroñ katak jãn waanjoñak ko an armej rein. (Rom 15:4; 1 Korint 10:6) Em̦õj kõjenolo̦k bok in ñan 14 jebta ko. Ilo jinoin kajjojo jebta, ewõr  kõmel̦el̦e ko rekkadu kõn jet iaan men ko jemaroñ katak ilo jebta kein.

El̦aññe ewõr nejũm̦ ajri, kwõmaroñ riit juon katak ippãn innem bwebwenato ippãn kõn pija ko ilo katak eo. Ñe em̦õj, komiro maroñ riiti eoon ko me katak eo ej itok jãne. Jipañ eo nejũm̦ bwe en maroñ kile wãween an eoon ko ej riiti ekkejell̦o̦k ippãn katak eo. Kwõmaroñ kõm̦m̦ane ejja wãween in wõt ilo am̦ jipañ rũtto ro ñan mel̦el̦e kõn Baibõl̦ eo.

Kõmij kõjatdikdik bwe bok in enaaj jipañ aolep ro em̦ool bũrueer, ro rerũtto im ro reddik jim̦or ñan katak jãn Naanin Anij im ñan l̦oore katak ko ie ilo mour ko aer. Tokjãn men in, remaroñ kabuñ ñan Jeova ãinwõt ro rej uwaan baam̦le eo an.