Muihni, lakri latwankira nani:

Jehova ra mayuni banhwi ba, ai Bîla Baibil ba, latwan kaikisa. Yawan pain nu sa bahara sturi kasak bâra sa, kupia kraukanka nani sin wan rayaka dukiara, bara Jehova latwanka lâka pranakira ba sâkbia, yawan dukiara (Lawana 119:105; Luk 1:3; 1 Jan 4:19). Wan brinka pali sa wala nani ra hilp munaia lan takaia, kasak tânka manakira nani Gâd Bîla ra ba. Baha lukanka wal, yang nani lilia sna naha bukka na mihtam ra mangkaia: Baibil wina smalkanka nani lan takisna. Brin wan daukisa naha bukka tânka kum kum ba mai wiaia.

Naha bukka na tuktan nani ra luki, paskan sa. Ban sakuna, upla almuk nani Baibil wina kau lan takaia want nani ra sin hilp munaia sip sa. Bara, Baibil ba upla sut dukiara sa bamna, yawan sut ai smalkanka nani wina yamni ailal sâkbia, kan kasak pali lilia takaia hilp wan munaia sip sa.

Baibil sturka nani wina brih, naha bukka na upla nani dukiara aisisa, Gâd diara nani paskan piua ba wina. Kasak pali trai munan sa baha sturka nani ba klir bara isi marikaia, dîa ba kat, nahki takan ba wina.

Ban sakuna, bukka na Baibil sturka nani baman aisaras sa. Ulbanka bara lilka nani ba ridi daukan sa, Baibil sturka ba rayaka bri baku kaikbia, bara baha uplika nani nahki ai dara wali kan ba sin klir kaikaia.

Naha bukka na hilp wan munisa kaikaia Baibil ba buk kum, upla dukiara aisisa: Jehova bîla walan bara bîla walras nani kan ba. Baku sin, baha uplika nani samplika ba wina, diara lan takaia hilp wan munisa (Roman 15:4; 1 Korint 10:6). Bukka na  pîs 14 brisa. Pîska kum tâ krikanka bani ra, ulbanka kunhku kum bâra sa, smalkanka kum kum wina yawan lan takaia sip ba.

Man luhpa nani brisma kaka, witin nani wal smalkanka kum aisi kaikaia sip sma, bara aikuki, lilka nani ba dukiara aisaia. Baha wina, Baibil tikska smalkanka aisi ba, aisi kaikaia sip sma. Luhpiam nani ra hilp muns tânka briaia, Baibil ra aisi kaiki ba wih bukka ra smalki ba wal asla sa. Almuk kum wal, sim tnatka yus munaia sip sa Baibil smalkanka nani ba tânka bribia dukiara.

Wan brinka sa, naha bukka na upla kupia painkira nani ra hilp munbia, wahma, tiara bara almuk kabia sin Gâd bîla ba wina lan takaia, bara ai rayaka ra sin alki daukbia. Baku lika witin nani Jehova ra mayunaia sip kabia bara ai uplika latwankira nani tilara kabia.