Ñaniyó xíʼin ku̱ʼvayó:

Miíyó na̱ ndásakáʼnu Jehová kúʼvi̱ní-iniyó xíniyó tu̱ʼunra. Kúnda̱a̱-iniyó nu̱ú ña̱yóʼo kivi ndani̱ʼíyó historia ña̱ ndixa ku̱u, kivitu ndani̱ʼíyó consejo ña̱ kivi chindeé táʼan xíʼinyó ta saátu va̱xi prueba ña̱ ndixaní kúʼvi̱-ini Jehová xínira na̱ ñuura (Salmo 119:105; Lucas 1:3; 1 Juan 4:19). Ña̱ kúni̱ndi̱ kúúña sanáʼa̱ndi̱ na̱ yiví xa̱ʼa mií ña̱ nda̱a̱ ña̱ va̱xi nu̱ú Biblia. Ña̱kán kúsi̱íní-inindi̱ káʼa̱nndi̱ xíʼinndó ña̱ ka̱na libro yóʼo, ña̱ naní: Ña̱ sákuaʼayó nu̱ú Biblia. Kúni̱ndi̱ ka̱ʼa̱nndi̱ xíʼinndó xa̱ʼa sava ña̱ va̱xi nu̱ú libro yóʼo.

Ña̱ libro yóʼo na̱kuva̱ʼaña xa̱ʼa na̱ va̱lí. Soo kivitu kaʼvi na̱ xa̱a̱ náʼnuña tá kúnikana sakuaʼana xa̱ʼa Biblia. Xa̱ʼa ña̱ kúú Biblia iin libro ña̱ kúúmií ndiʼi na̱ yiví, ña̱kán va̱ʼaní chindeé táʼan ña̱ va̱xi nu̱úña xíʼinyó, tasaá va̱ʼaní si̱í kundooyó.

Nu̱ú Biblia ka̱na ña̱ va̱xi nu̱ú libro yóʼo, káʼa̱nña xa̱ʼa na̱ yiví na̱ xi̱kundoo nda̱a̱ tá na̱kuva̱ʼa ñuʼú. Ña̱ tutu yóʼo káxiní na̱kuva̱ʼaña ta va̱ása yo̱ʼvi̱ káʼa̱nña, ta saátu va̱xiña nda̱a̱ tá ki̱ʼva ku̱uña.

Ña̱ libro yóʼo va̱ʼaní nátúʼunña historia xíʼinyó. Texto ña̱ va̱xi xíʼinña xíʼin na̱ʼná na̱kuva̱ʼaña ña̱ va̱ʼaka kunda̱a̱-iniyó xíʼinña.

Ña̱ libro yóʼo chíndeé táʼanña xíʼinyó ña̱ kunda̱a̱-iniyó xíʼin ña̱ káʼa̱n Biblia xa̱ʼa na̱ yiví na̱ xi̱niso̱ʼo ña̱ káʼa̱n Jehová xíʼin na̱ va̱ása níxiniso̱ʼo. Saátu chíndeé táʼanña xíʼinyó ña̱ sákuaʼayó xíʼin ña̱ ke̱ʼé na̱ xi̱ndoo tiempo saá (Romanos 15:4; 1 Corintios 10:6). Ña̱ libro yóʼo 14 táʼví va̱xi nu̱úña. Tá kíxaʼá iin táʼví yóʼo, káʼa̱nña xa̱ʼa sava ña̱ kivi sakuaʼayó.

 Tá íyo na̱ va̱lí se̱ʼún, kivi kaʼviún iin capítulo xíʼinna, ta saátu ka̱ʼa̱nndó xa̱ʼa na̱ʼná ña̱ va̱xi nu̱úña. Tándi̱ʼi kivi nandukúndó nu̱ú Biblia ña̱ káʼa̱nnka xa̱ʼa historia yóʼo. Chindeé táʼan xíʼin na̱ va̱lí se̱ʼún ná kunda̱a̱-inina ndáa ki̱ʼva kítáʼan ña̱ va̱xi nu̱ú Biblia xíʼin iin iin ña̱ va̱xi nu̱ú libro yóʼo. Saátu kivi chindeé táʼanyó xíʼin iin na̱ xa̱a̱ chée tá kúni̱na kunda̱a̱ka inina xíʼin ña̱ va̱xi nu̱ú Biblia.

Kúni̱ndi̱ ná chindeé táʼan libro yóʼo xíʼin na̱ kúni̱ka kunda̱a̱-ini xa̱ʼa Jehová, tá kúú na̱ va̱lí xíʼin na̱ xa̱a̱ chée ña̱ ná sakuaʼakana xa̱ʼa tu̱ʼun Ndióxi̱ ta keʼéna ña̱ káʼa̱nña. Saá kúú ña̱ kivi ndasakáʼnuna Jehová ta koona na̱ ñuura.