Kuli Vamuanetu mu Lutsilielo:

Mu ku pua vangamba va Yehova vakua ku mu lemesa, tua lema Lizi Lieni, Mbimbiliya. Tua tava mpundu ngecize ya kala na mizimbu ya vusunga, vimamuna via cili vize vi hasa ku tu tuamenena mu ku yoya cetu na cilemo ca kala naco Yehova na vantu. (Visamo 119:105; Luka 1:3; 1 Yoano 4:19) Tua kala na cizango ca kama ca ku kuasa vakuetu va lilongese vusunga vua mu Lizi lia Njambi. Omo liaco, tua viukilila cikuma ku tuhula lino livulu, “Vimpande vi u Hasa ku Lilongesa mu Mbimbiliya.” Ngeci mukemuo, tu tonda ku mi lombuelela kavundende via livulu liaco.

Mitamba ya yingi ya lino livulu, va na i viukisila vanike. Vunoni citava naua ku lipangesa mu ku kuasa vakuluntu vaze vali na cizango ca ku lilongesa via vingi mu Mbimbiliya. Mu ku linga Mbimbiliya ya pua livulu lia vantu vose, tuli na vusunga ngecize tu vose tu ka uana vukuasi mu ku lilongesa vimpande vi ka tu kuasa ku kala na ndzolela ya vusunga.

Mu ku pangesa mizimbu ya mu Mbimbiliya, lino livulu li ka tu leka via vusoko vua vantu tunde ku ku tanga na ku lutue. Ca tondekele ku lihakela kapandi ka kama ka ku soneka mizimbu ya mu Mbimbiliya mu njila ya ku sungama, kaha ya yasi na mu cifua ci ya likavela mizimbu yaco.

Lino livulu, li ka tu longesa via vingi ku tuala ha vimpande via mu Mbimbiliya. Mezi na vifikula va na vi viukisa mu njila i hana muono ku mizimbu ya Mbimbiliya na ku vantu va va handekamo.

Eli livulu li ka tu kuasa ku mona ngecize Mbimbiliya ya pua livulu lia handeka via vantu—vaze vononokele Yehova na vaze ka va mu ononokele. Kaha naua li ka tu kuasa ku mona vi tu hasa ku lilongesa ku malungano avo. (Loma 15:4; 1 Kolintu 10:6) Lino livulu  va na litepe mu mitamba ya ku pua 14. Ku vuputukilo vua nkala mutamba kuli mpupulule ya vimo vimpande vi tu hasa ku lilongesa mu mutamba uaco.

Nga mua pua cisemi, mu hasa ku tanda cimo cimpande na vana venu na ku simutuila ha vifikula viliho. Tandenu mikanda ya mu Mbimbiliya ha va na tundisa cimpande caco. Kuasenu vana venu va tombuese vi va tanda mu Mbimbiliya na mu livulu. Citava mu pangese njila yaco nga muli na ku kuasa vakuluntu va hete ha ku tantekeya muzimbu ua mu Mbimbiliya.

Tua lavelela ngecize eli livulu li ka kuasa vose vakua mitima ya cili—vanike va vandende na vakuluntu—ku lilongesa Lizi lia Njambi na ku pangesa vilongesa vialio mu muono uavo. Kaha navo va ka hasa ku mu lemesa mu ku pua vusoko vueni vua lema.