Toikniuaj katli tiinmechikneliaj:

Katli tijueyichiuaj Jehová tijpatiitaj iTlajtol, Biblia. Timotemachiaj nochi tlen nopaya kiijtoua nelnelia panok, tijmatij tlen techtlajtolmaka uelis techpaleuis ipan tonemilis uan tikitaj kenijkatsa Jehová kinextijtok kiniknelia maseualmej (Salmo 119:105; Lucas 1:3; 1 Juan 4:19). Nelnelia tijnekij tikinpaleuisej sekinok nojkia ma kiyekokaj nopa tlamachtili tlen tlauel ipati tlen eltok ipan toTeotsij iTlajtol. Yeka, tlauel tiyolpakij tiinmechiljuisej mochijki ni amochtli: Tlen nechmachtia Biblia. Tiinmechiljuisej kenijkatsa mochijchijtok ni amochtli.

Maske ni amochtli tlauel kinpaleuis konemej, nojkia kinpaleuis katli ya uejueyij uan nojua kinekij kimatisej tlen Biblia tlamachtia. Uan pampa Biblia kinpaleuia nochi maseualmej, timotemachiaj nochi tojuantij techpaleuis nopa tlamachtili tlen nikaj uala, pampa techpaleuis nelnelia ma tiyolpakikaj.

Nochi tlamachtili tlen eltok ipan ni amochtli mokixtijtok ipan Biblia. Kiijtoua tlen achtouia kinpanok maseualmej, uan peua kiixtoma kema toTeotsij kichijchijki nochi tlen onka. Mochijki kampeka amo ouij ma mokuamachili nochi tlamachtili, uan nojkia kampa uelki, moijkuilok kej panotiajki.

Ni amochtli amo san techpouilia tlen kiijtoua Biblia. Nochi tlapoualistli uan tlaixkopinkayomej techpaleuia kejuak ma tikitakaj tlen Biblia kiijtoua panok uan ma tijmatikaj tlen nopa maseualmej kiyolmatkej.

Ni amochtli techpaleuia ma tijmatikaj Biblia kiijtoua tlen kichijkej sekij maseualmej: katli kineltokakej Jehová uan katli kiixpanokej. Uan technextilia tlake techmachtia se keski tlamantli tlen inijuantij kichijkej (Romanos 15:4; 1 Corintios 10:6). Ni amochtli kipia 14 tlaxeloli. Kampa peua sejse tlaxeloli, ika se keski tlajtoli kiixtoma tlen uelis tijyekosej.

 Tlaj tikinpia mokoneuaj, uelis tijpouas ininuaya se tlamachtili, uan sansejko inkiijtosej tlake inmechmachtia nopa tlaixkopinkayomej. Teipa, ipan Biblia uelis inkipouasej kampa mokixtijtok nopa tlapoualistli. Xijpaleui mokone ma kiita kenijkatsa tlen ijkuilijtok ipan sejse tlapoualistli mokixtijtok ipan Biblia. Nojkia kiampa uelis tikinmachtisej tlen Biblia tlamachtia katli ya uejueyij.

Nelnelia tijnekij ni amochtli ma kinpaleui maseualmej katli kipiaj kuali ininyolo, telpokamej uan katli ya uejueyij, ma kimatikaj tlen Biblia tlamachtia uan ma kichiuakaj ipan ininnemilis tlen kiyekosej. Kiampa inijuantij nojkia kiueyichiuasej Jehová ininuaya sekinok itekipanojkauaj.