Tokniuantsitsin:

Akin tikueyichiuaj Jiova tikpatiuitaj iTajtol, Biblia. Senkis tikneltokaj ke yekmelauj mochiuak tein ompa kijtoua, ke kipia tayolmajxitilis tein tapaleuia uan tein kinextia ke Jiova kinteltasojta taltikpakneminij (Salmo 119:105; Lucas 1:3; 1 Juan 4:19). Yekmelauj tiknekij tikinpaleuiskej oksekin maj kiixmatikan tamachtilis tein melauak tein moajsi itech iTajtol Dios. Yejua ika, techyolpaktia tikixtiskej nejin amatajkuilol: Tamachtilismej tein nikajsi itech Biblia. Maj tamechiluikan seki taman tein kipia.

Nejin amatajkuilol mochijchiuak kemej okachi kinpaleuis konemej. Sayoj ke, no uelis kintelpaleuis akin uejueykejya akin kinekij okachi kimatiskej tein kijtoua Biblia. Uan kemej Biblia kinpaleuia nochin taltikpakneminij, amo tiomeyolouaj ke tinochin techpaleuis komo tikitaj toni techmachtia, porin uelis kichiuas maj yekmelauj tiyolpakikan.

Ika tein kijtoua Biblia, nejin amatajkuilol ika tajtoua keniuj neminij taltikpakneminij. Tiktemojkej maj moajsikamati, uan nochipa keman uelik, motekpanak ijkon kemej mochiujtiyajki.

Sayoj ke, amo sayoj kitetapouia tein panok ne uejkauj. Tajkuilol uan taixkopimej mochijchiujkej kemej se kinemilis ke ompa se moajsi uan kemej kinextis keniuj momachiliayaj akin ininka motajtoua.

Nejin amatajkuilol techpaleuia maj tikitakan ke Biblia ininka tajtoua taltikpakneminij: akin kitakamatkej Jiova uan akin amo. No techpaleuia maj tikitakan toni techmachtia tein kinpanok (Romanos 15:4; 1 Corintios 10:6). Kipia 14 taxelolmej. Keman peujteua sejse taxelol, kimelaua ika amo miak tajtolmej seki taman tein uelis timomachtiskej.

 Komo tejuatsin tikonpia konemej, uelis tikonixtajtoltis se tamachtilis iniuan, uan ika nantajtoskej taixkopimej. Ompa, uelis nankiixtajtoltiskej itech Biblia kampa mokixtij nejon tamachtilis. Xikonpaleui mokonetsin maj kiita keniuj mouika tein kiixtajtoltia itech Biblia uan tamachtilis tein tikajsij itech sejse capítulo tein moajsi itech nejin amatajkuilol. No ijkon uelis se kipaleuis aksa akin ueyiya maj kiajsikamati tein tamachtia Biblia.

Tikchiaj maj nejin amatajkuilol kinpaleui akin yolmelaujkej, telpochmej uan akin uejueykejya, maj kimatikan tein tamachtia iTajtol Dios uan maj kichiuakan tein kinmachtia. Ijkon yejuan no uelis kiueyichiuaskej Jiova uan pouiskej iniuan ichankauan akin kinteltasojta.