Anna Oosiveliwa:

Ntoko achu a Yehova, ninnasivela Masu awe, Piipiliya. Ninnaroromela wi onnathariha miyaha soochuneya, onnavaha ohoolela ni yawooniherya ya osivela Yehova oreiyeno ntakhara achu. (Salumu 119:105; Luka 1:3; 1 Yohani 4:19) Ninnachuna waakhaviherya akina ohuserya iparipari soochuneya inaphwanyeya mu Masu a Muluku. Wi eyo yeereye, nootepa ohakalala ompaka liivuru yoola, Ohuserye Miyaha sa Piipiliya. Ninnachuna wooleelaani sa vakhaani vooloca sa liivuru yoola.

Liivuru ola opakiwe xaxaxa yuupuweliwaka anamwane. Naamwi hiiha, onanwerya tho ophariheliwa wi ekhaviheryiwe achu akina yaawo anachuna ohuserya miyaha sa Mpiipiliya. Woona wi Piipiliya taachu oothene, moohikhwa minikwa oothene hiyo nnahaala okhaviheryeya orweela wuuluulela miyaha seiya ni ophwanya ohakalala weeparipari.

Mwawiiwanana ni miyaha sa Piipiliya, liivuru yoola onnaloca yaweereya ya achu ovinyerya wuupaceryani oya ohoolo. Miyaha sa Mpiipiliyani sohooniheryiwa mmukhalelo wookwakwaleya, wookhweya wiiwexexa ni woocharelana.

Liivuru yoola, tahi wi onamoona oloca saweereya sa Piipiliya. Soorepa ni iruku sinnakhaviherya wuupuwelela ni ophuravo echu orweela mu miyaha sa Piipiliya.

Ekaruma ela ennanikhaviherya woona wi Piipiliya onnaaromola achu—yaale yaamwiiwelenle Yehova ni yaale yahaamwiwelenle. Nave ennanikhaviherya ophuravo echu ni sootakiherya saya. (Aroma 15:4; 1 Korinto 10:6) Liivuru ola okawanyiwe mmakupa 14. Omapacereryo wa nikupa noothene inatharihiwa miyaha nnahaalaahu ohuserya.

 Mwaari tiithi, mwaalakhanye mwaha ni mwaninyu nave mwiiwananihe ni eruku. Voocharela mwaalakhanye makupa a Piipiliya aniiwanana ni mwaha. Mmukhaviherye mwaninyu olikanyiha echu onaalakhanyeiye Mpiipiliya ni mwaha wa liivuru. Mukhalelo mmohamoha onanwerya tho ophariheliwa wi akhaviheryiwe muchu mutokweene ohuserya miyaha sa Piipiliya.

Ninnawehererya wi liivuru ola onahaala waakhaviherya achu oothene​—anamwane ni atokweene​—ohuserya Masu a Muluku ni opharihela muukumini mwaya. Ntoko yookhumelela, awo tho anahaala omulapela Yehova vamoha ni achu awe oosiveliwa.