Yáʼátʼééh Dadiiʼní:

Jiihóvah deidósinii daniidlı̨́, áko Diyin Bizaad ayóóʼádeiyíníiʼní. Éí nihokááʼ dineʼé níléídę́ę́ʼ ádáátʼįįdii nizhónígo yaa halneʼ, yáʼátʼéehgo oodáał dooleełgi ałdóʼ yee naʼnitin áádóó Jiihóvah bílaʼashdlaʼii ayóóʼáyóʼníigo bééhózínígo ííłʼı̨́. (Psalm 119:105; Luke 1:3; 1 John 4:19) Diné tʼáá ałtso Diyin Bizaad biiʼdę́ę́ʼ tʼáá aaníí naʼnitin yídahwiidoołʼááł bá laanaa daniidzin. Áko díí naaltsoos, “Diyin Bizaad Bitsʼą́ą́dóó Íhooʼaah” wolyéhígíí nihá ádeiilyaa. Tʼáá áłtsʼísígo chʼídadiitʼááł.

Díí naaltsoos éí áłchíní íiyisíí bá ályaa. Ákondi, tʼáá háí shı̨́ı̨́ Diyin Bizaad bíhwideeshʼááł nízinígíí ałdóʼ bíká adoolwoł. Diyin Bizaad éí tʼáá ałtso diné bá átʼé, éí yee naʼnitinígíí baa nitsíikeesgo nihíká análwoʼgo nihił hózhǫ́ǫ doo.

Díí naaltsoos éí Diyin Bizaad biiʼdę́ę́ʼ dahaneʼígíí bikʼehgo nihokááʼ dineʼé ábiʼdilyaadóó wóshdę́ę́ʼ ádahóótʼįįdii yaa halneʼ. Haneʼ doo nantłʼagóó bikʼidiʼdiitı̨́ı̨́ł biniyé haleedí bee hadilyaa. Haneʼígíí éí ałkééʼ ádahóótʼįįd yę́ę bikʼehgo ałkééʼ sinil.

Díí naaltsoos doo haneʼ tʼéiyá bee hadítʼée da. Saadígíí jółtaʼgo éí nidaashchʼąąʼígíí bił ahąąh nijiiníił doogo ályaa. Kótʼéego Diyin Bizaad yaa halneʼígíí jółtaʼgo éí áadi ajítah nahalin, áádóó íídą́ą́ʼ diné nitsídaakees yę́ęgi hoł bééhózin łeh.

Diyin Bizaad biiʼ éí łaʼ Jiihóvah yikʼeh dahółʼı̨́ áádóó łaʼ éí ndagaʼ ńtʼééʼ yę́ę baa dahaneʼ, díí naaltsoos yee nihił halneʼ. Éí bitsʼą́ą́dóó ídahwiidiilʼáałgo átʼé. (Romans 15:4; 1 Corinthians 10:6) Haneʼ 14go ałtsʼá daasʼnilgo ályaa. Áádóó éí tʼóó bee hahalzhishígi tʼóó chʼétʼánígo bíhwiidooʼáałii yaa halneʼ.

 Naʼáłchíní hólǫ́ǫgo, haneʼ tʼááłaʼígo neʼawééʼ bichʼįʼ yídííłta áádóó naʼashchʼąąʼígíí bił baa nídíítʼįįł. Bikéédóó éí Diyin Bizaad kweʼé bídéétʼiʼgi bił yídííłta. Diyin Bizaad biiʼdę́ę́ʼ naʼnitin áádóó díí naaltsoos yaa halneʼígíí ahídéétʼiʼgi neʼawééʼ bee nanítin. Áłchíní bił wóltaʼígíí bikʼehgo ałdóʼ tʼáá háí shı̨́ı̨́ Diyin Bizaad bíhwideeshʼááł nízinii íhwiidoołʼááł.

Tʼáá ałtso diné yáʼátʼéehgo nitsídaakeesii díí naaltsoos bíká adoolwołgo bá laanaa daniidzin. Diyin Bizaad biiʼdę́ę́ʼ naʼnitin yídahwiidoołʼááł áádóó yikʼehgo dahináa doo daniidzin. Áko, Jiihóvah bidineʼé bitahdóó atah dahodísin doo.