Vakuatate Ononthyolwe:

Onthue atuho tufenda Jeova, tupu tuhole Ondaka yae, Ombimbiliya. Tuna onthumbi yokuti omahipululo tuvasa Mondaka ya Huku otyotyili, tupu onondonga mbukahi-mo mbuyumbwa onthumbi, mbulekesa ohole ononene Jeova ena nonthue. (Salmo 119:105; Lucas 1:3; 1 João 4:19) Tuhanda unene okukuatesako ovanthu aveho okunoñgonoka otyili tyikahi Mondaka ya Huku. Opo tutyivile, tualinga omukanda ou nehambu una osapi yati, “Lilongesila Komahipululo Ombimbiliya”. Matupopi katutu ovipuka vikahi momukanda ou.

Pokuhoneka omukanda ou haunene tuasoka kovana. Mahi, tupondola okukuatesako nao ovakulu vahanda okunoñgonoka vali Ombimbiliya. Mokonda Ombimbiliya omukanda walingilua ovanthu aveho, ovipuka ilongesa atuho vitukuatesako okukala nehambu.

Muna onotestu mbo Mbimbiliya, tupu upopia konthele yovanthu tunde apa vatungua. Kualingua ononkhono ononene opo omahipululo Ombimbiliya apopiwe monkhalelo imwe yapepuka nokwayandyuluka, nokupopia monkhalelo ovipuka viaenda.

Mahi, omukanda ou kaupopi vala omahipululo Ombimbiliya. Onondaka no malutalatu ekahi-mo, vialingwa opo vikuateseko omunthu ukahi nokutanga, elitehelele ngatyina nae ankho opo ekahi nokulitehelela ngetyi tyelitehelele ovanthu vapopiwa mehipululo.

Omukanda ou tupu utukuatesako okutala okuti Mombimbiliya muna omahipululo ovanthu vetavevele Jeova na vana vehemutavelele. Tupu mautukuatesako okutala oityi tulilongesila kovanthu ovo. (Romanos 15:4; 1 Coríntios 10:6) Omukanda ou wayapulua ononthele 14. Konthyimbi ya kese nthele kuna onondaka mbuhangununa oityi tulilongesa mu kese kapitulu.

 Inkha una ovana, vetangela ovikapitulu viomukanda ou otyo mutomphola konthele yavio. Konyima upondola okutanga ono testu Mombimbiliya omu muapolwa ehipululo. Kuatesako ovana vove opo vaimbuke okuti otestu oyo yelikuata nehipululo liomukanda. Tupu upondola okulinga ngotyo inkha ukahi nokukuatesako omukulu umwe opo anoñgonoke nawa Ombimbiliya.

Tuhanda unene omukanda ou ukuatesako ovanthu ovanyingi—ovana novakulu—opo velilongese Ondaka ya Huku nokuendela muetyi velilongesa. Inkha valinga ngotyo, tupu navo mavafende Jeova kumwe novanthu vae.