Ab’eishe-emwe Bagyenzi Baitu Abakundwa:

Itwe abaheereza ba Yehova nitukunda Ekigambo kye, Baibuli. Nitwikiriza ngu erimu ebyafaayo ebihikire, obuhabuzi oburikwesigwa, n’obuhame oburikworeka rukundo ei Yehova ainiire abantu be. (Zaaburi 119:105; Luka 1:3; 1 Yohaana 4:19) Twine ekihika ky’okuhwera abandi kwega amazima g’omuhendo agari omu Kigambo kya Ruhanga. N’ahabw’ekyo, nitushemererwa kushohoza ekitabo, Amashomo Agu Orikwega omu Baibuli. Ka tubagambire bimwe aha birimu.

Okukira munonga ekitabo eki, kitebeekanisiibwe kuhwera abaana. Kwonka, nikibaasa kukoresibwa kuhwera n’abakuru abarikwenda kwega bingi ebiri omu Baibuli. Kandi obu Baibuli kiri ekitabo kya buri omwe, hatariho kubanganisa twena nitwija kugasirwa twashwijuma ebirimu, kitubaasise kugira okushemererwa.

Ekitabo eki nikigamba ebirikukwata aha bantu kuruga aha kuhanga n’ebyakuratsireho. Haakozirwe bingi kubaasa kuhandiika ebiri omu Baibuli omu kitabo eki omu muringo ogworobi kandi ogurikwetegyerezibwa nk’oku birikukuratana.

Ekitabo eki, tikirikugamba aha biri omu Baibuli byonka beitu kirimu n’ebindi bingi. Ebihandiikirwemu hamwe n’ebishushani ebirimu bitebeekanisiibwe kushoboorora gye ebiri omu Baibuli n’enyehurira z’abarikugambwaho.

Ekitabo eki nikituhwera kumanya ngu ebiri omu Baibuli nibikwata aha bantu abaayorobeire Yehova n’abaamugomiire. Kandi nikituhiga kugira ebi twayegyera aha by’okureeberaho byabo. (Abarooma 15:4; 1 Abakorinso 10:6) Ekitabo eki kirimu ebicweka  14. Aha kutandika kwa buri kicweka hariho ebi turikubaasa kukyegamu omu bugufu.

Waaba ori omuzaire, noobaasa kushoma eishomo n’omwana waawe kandi muhikaanise ebiteekateeko aha bishushani ebirimu. Reero mushome hamwe ebyahandiikirwe ahu eishomo rirugire. Hwera omwana waawe kuhikaanisa ebi arikushoma omu Baibuli n’ebiri omu kitabo. Na waaba noohwera omuntu mukuru noobaasa kukoresa omuringo nigwo gumwe kumuhwera kwetegyereza eki Baibuli erikwegyesa.

Twine amatsiko ngu ekitabo eki nikiija kuhwera abacureezi boona​—abakuru n’abato—​kwega ebiri omu Kigambo kya Ruhanga kandi bakabigyenderaho. N’ekiraarugyemu, nibabaasa kuramya Yehova nk’abaheereza be abarikukundwa.