Imizu Eghoghanren:

Ọwan ri rhiẹ ihworho ra ga i Jehova, i vwo ẹguọlọ kpahen ẹmro ọnẹyen ro rhiẹ i Baibol na. Ọwan i vwo imwẹro taghene i Baibol na o vwo iyẹnrẹn rọ gbare, ọkpọvi ra na sabu hẹroso ọrhẹ oborẹ o djerie phia taghene i Jehova o vwo ẹguọlọ kpahen ituakpọ. (Psalm 119:105; Luke 1:3; 1 John 4:19) Ọwan i vwo omwemẹ ra na ha userhumu rẹn awọrọ yono urhomẹmro eghoghanren re ha uvuẹn i Baibol na. Omarana, oma ọ merhenrẹn ame, rẹ ame e tiobọnu ọbe ọnana, Oborẹ wu na Sabu Yono nẹ i Baibol na rhe. Jenẹ ame i ta rẹn are kpahen ọbe ọnana ibiesuọn.

Emọvwerhe ye vwo rhẹ ẹhẹn ru ọbe ọnana. Ọrẹn, ana ji sabu haye yono imirẹghwa ri vwo omwemẹ rẹ aye ine yono kpahen i Baibol na. Ra mẹriẹn taghene i Baibol na ọbe harẹn kohworho kohworho na, o vwo ẹfro-o, ọwan ephian ina mẹrẹn erere, erhe yono kpahen iyono enana ri na ha userhumu rẹn ọwan mẹrẹn obọdẹn omamerhomẹ.

Ọbe ọnana ọ ta kpahen ikuegbe i Baibol na nẹ ọtonrhọ rhe. A damoma nẹ ikuegbe ri ha uvuẹn ọbe na i lọhọ jeghwai fiotọre, lele oborẹ aye i phia lele.

Ọrẹn, ọbe ọnana ọ ghwai hunute ikuegbe i Baibol na ọvo-o. Ọrẹn, o ji vwo ifoto ri na lẹrhẹ ọwan vwẹruọ iyẹnrẹn na fiotọre, jeghwai lẹrhẹ ọwan vwẹruọ erhirhiẹ ihworho na i dẹrughwaroghwu.

Ọbe ọnana ọnọ ha userhumu rẹn ọwan mẹrẹn oborẹ i Baibol na o ru rhiẹ ọbe rọ ta kpahen ihworho sansan ri huvwele i Jehova ọrhẹ eri vwa huvwele yi. Ọbe ọnana ọ ji ha urhebro rẹn ọwan ne yono emru nẹ udje aye. (Romans 15:4; 1 Corinthians 10:6) A ghalẹ ọbe na rhẹ eghọn 14. Ọtonrhọ oghọn owuowu o vwo ẹzẹkoko kpahen oborẹ ọwan ina sabu yono.

 Orhianẹ wẹwẹ ọmiọmọ, wu na sabu se uyono owu harẹn ọmọ ọnọ, ne wu jeghwai dje ifoto na fiotọre riẹn. Orho ru, are awanva i gbe se ekete i Baibol ra bọn uyono na kpahen. Wu na sabu ta rẹn ọmọ ọnọ, nọ ta wẹn oborẹ ekete i Baibol na o ru surhobọmwu oborẹ ọ ha uvuẹn ọbe na. Wu na ji sabu ha ona ọnana ruiruo, we rhe yono omirẹghwa nọ sabu vwẹruọ oborẹ are i se nẹ i Baibol na rhe.

Ame i fiẹrorhọ taghene ọbe ọnana ọnọ ha userhumu rẹn ihworho ri vwo ẹhẹn esiri yono nẹ Ẹmro Osolobrugwẹ rhe, jeghwai ha iyono ri havwiẹ ruiruo uvuẹn akpenyerẹn aye. Neneyo, aye i ji sabu kwomakugbe ekrun i Jehova ha ẹga riẹn.