Zi kuhu̱:

Gatꞌho toꞌo di pe̱päbihu̱ rä Zi Dada Jeoba, di mädihu̱ rä Noya. Nuju̱ di pädihu̱ ge mäjuäni gatꞌho näꞌä hutsꞌi ha rä Biblia, ꞌne ge nuꞌu̱ yä tsꞌofo uni dä za dä maxkägihu̱ ha mä mꞌu̱ihu̱. Pe hingä ho̱nse̱ꞌä, ꞌnehe udi hängu di mäkägihu̱ rä Zi Dada Jeoba (Salmo 119:105; Lucas 1:3; 1 Juan 4:19). Xa di nehe ge märꞌa yä jäꞌi dä bädi ꞌnehe nuꞌu̱ yä hogä ntꞌudi hutsꞌi ha rä Biblia. Hänge ko ndunthi rä johya di presentaꞌihe rä mfistꞌofo: Nuꞌu̱ yä ntꞌudi ma gi pädi de rä Mäkä Tꞌofo. Ma gä xiꞌähe te hutsꞌi ha nunä mfistꞌofo.

Nunä mfistꞌofo bi thoki pa yä bätsi. Pe nuꞌu̱ yä ntꞌudi hutsꞌi ꞌnehe dä za dä matsꞌi yä däta jäꞌi. Ha nunä mfistꞌofo ma gä pädihu̱ yä hogä tsꞌofo nuꞌu̱ ma dä maxkägihu̱ kada nꞌa de gekhu̱, pa gä pe̱ꞌtsihu̱ rä johya ha mä mꞌu̱ihu̱.

Nunä mfistꞌofo pede nuꞌu̱ yä tꞌo̱tꞌe bi thogi dende nuꞌmu̱ bi thoki Adán ꞌne Eva. Kasi gatꞌho nuꞌu̱ yä ꞌmede hutsꞌi ha nunä mfistꞌofo, bi tꞌofo ha näꞌä orden bi thogi nuꞌu̱ yä tꞌo̱tꞌeꞌu̱. ꞌNehe, nunä mfistꞌofo hingi ñꞌoui yä noya xä ñhei, ngeꞌä di nehe ge yä bätsi dä ntiende xä ñho nuꞌu̱ yä ꞌmede de rä Mäkä Tꞌofo.

Nuꞌu̱ yä dibujo di ñꞌoui nunä mfistꞌofo, xä thoki pa dä maxkägihu̱ gä ntiendehu̱ ꞌne gä imäjinähu̱ te mi senti nuꞌu̱ yä jäꞌi pede rä Biblia.

Ha nunä mfistꞌofo ma gi hyandi ge rä Biblia pede tanto de nuꞌu̱ yä jäꞌi bi yꞌo̱te rä Zi Dada Jeoba ꞌne nuꞌu̱ hinä. ꞌNe udi te dä za gä pädihu̱ de kada nꞌa de geꞌu̱ (Romanos 15:4; 1 Corintios 10:6). Nunä mfistꞌofo xä theke ha 14 yä sección, ꞌne ha fu̱di kada nꞌa de gehya, xikägihu̱ nꞌa tu̱i te ma gä pädihu̱ ha nuꞌu̱ yä ntheke di sigi.

 Mu̱ nuꞌi gi pe̱ꞌtsi yä bätsi, dä za gi hñetihu̱ xo̱ge nꞌa rä ntheke, hyandihu̱ nuꞌu̱ dibujo ꞌne mꞌe̱fa ñähu̱ de geꞌu̱. Mꞌe̱fa dä za gi hñetihu̱ nuꞌu̱ yä testo ehe ha näꞌä nthekeꞌä, ngeꞌä ja xä thäibu̱ nuꞌu̱ yä ꞌmedeꞌu̱. Fatsꞌi ri bätsi pa dä hyandi hanja dä za dä matsꞌi ha rä mꞌu̱i nuꞌu̱ yä ꞌmede ehe ha nunä mfistꞌofo. Geꞌä dä za gi pe̱fi ꞌnehe pa gi fatsꞌi yä däta jäꞌi dä bädi nuꞌu̱ yä ꞌmede hutsꞌi ha rä Biblia.

Di nehe ge nuꞌu̱ yä ꞌmede ehe rä ha rä Biblia, dä matsꞌi tanto yä bätsi, yä bäsjäꞌi ꞌne yä däta jäꞌi pa dä hyandi hanja dä me̱fi ha yä mꞌu̱i nuꞌu̱ yä tsꞌofo ehe ha rä Biblia. Njabu̱, nuꞌu̱ ꞌnehe dä za dä joni ko rä Zi Dada Jeoba ꞌne dä yꞌo̱tꞌe yä amigo.