Leewe Gloowesbreeda:

Aus Jehova siene Deena hab wie Leew fa sien Wuat, de Bibel. Wie sent ons secha, daut et krakjt stemt, waut de Bibel von de ieeschtemmasche Tiet sajcht, un daut dee äa Rot opp to veloten es un daut dee ons weeten lat, waut vonne groote Leew Jehova fa de Menschen haft (Psalm 119:105; Lukas 1:3; 1. Johanes 4:19). Wie wenschen ons von Hoaten aundre to halpen, daut dee de wieetvolle Lieren en Gott sien Wuat kjanen lieren. Doawäajen jeft ons daut eene groote Freid, dit Buak “Goode Lieren ut de Bibel” ruttojäwen. Waut es daut fa een Buak?

Dit Buak es besonda fa Kjinja jemoakt. Oba eena kaun daut uk brucken toom groote Menschen halpen, wan dee mea von de Schreft weeten wellen. Un wäajens de Schreft een Buak fa aulem es, kjemt ons daut aula togood, wan wie ons met de Lieren doabennen aufjäwen. Daut kaun ons halpen, woare Freid to haben.

En dit Buak sent Jeschichten von de Bibel, waut wiesen, woo daut met de Menschheit aunfunk un wiedajinkj. Doa es sea doaropp jeschauft worden, de biblische Jeschichten kloa un eefach opptoschriewen un dee wan mäajlich soo opptorieejen, aus dee passieet sent.

Oba en dit Buak sent nich eefach bloos Bibeljeschichten to finjen. Daut Jeschräwne un de Bilda sent soo jemoakt, daut eena sikj en de Jeschichten nenloten kaun un uk vestonen kaun, waut de Menschen von de Bibeltiet jefeelt haben.

Dit Buak wiest, daut de Schreft von väl veschiedne Menschen rät – von soone, waut Jehova jehuarsom wieren, un von soone, waut nich wieren. Dit Buak saul ons halpen, ons ut dee äa Läwen Lieren ruttonämen (Reema 15:4; 1. Korinta 10:6). Daut haft 14 Poat. Aum Aunfank von jieda Poat es eenjet toopjefot, waut eena von daut Poat lieren kaun.

 Wan jie Kjinja haben, dan wudd jie kjennen met dee toop een Kapitel läsen un äwa de Bilda räden. Dan kjenn jie de Bibelvarzh läsen, waut to daut Kapitel jehieren. Halpt june Kjinja to vestonen, daut aules, waut dee en dit Buak lieren, von de Bibel kjemt. Soo aus dit kaun eena daut uk doonen, wan groote Menschen weeten wellen, om waut daut en de Schreft jeit.

Wie hopen, daut dit Buak aule opprechtje Menschen – junge uk elre – halpen woat, von Gott sien Wuat to lieren un daut uk notokomen. Dan kjennen dee uk Jehova deenen un een Poat von siene leewe Famielje woaren.