Munasqa hermanosníy:

Jehová Diosta yupaychajkunaqa Bibliata jatunpaj qhawanchej. Yachanchejtaj Bibliaqa cabalta parlasqanta, yuyaychaykunasnintaj kausayninchejpi yanapawasqanchejta. Chantapis Bibliapi yachakullanchejtaj runasta Dios mayta munakusqanta (Salmo 119:105; Lucas 1:3; 1 Juan 4:19). Tukuy sonqo wajkunata yanapayta munayku Bibliamanta yachakunankupaj. Chayraykutaj Bibliamanta yachakunapaj nisqa librota orqhoyku. Kunantaj willariyta munayku imayna ruwasqachus kay libro kasqanta.

Kay libroqa wawaspaj, Bibliamanta astawan yachakuyta munajkunapaj wakichisqa kashan. Biblia tukuy runaspaj kasqanrayku, tukuypis Bibliaj nisqanwan yanapachikuyta atisunman. Imaraykuchus Bibliaqa kusisqas kausakunapaj yanapayta atiwanchej.

Kay libroqa Biblia nisqanman jina willawanchej imaynatachus kay jallpʼapi runas kausayta qallarisqankuta. Mayta kallpachakuyku tukuy ima willakusqan sutʼi, entiendeyta atinapaj jina kananpaj. Atikusqanman jinataj maykʼajchus, maypichus imapis kasqanman jina wakicherqayku.

Chantapis kay libroqa mana ñaupa tiempo runas imastachus ruwasqallankumantachu parlan. Astawanpis yachachikusqan, dibujosninpis wakichisqa kashan Bibliamanta yachakuyta munanapaj. Chantapis kay libroqa ruwasqa kashan ñaupa tiempomanta runas imaynatachus yuyasqankuta yachakunapaj.

Chantapis kay libropeqa yachakusun Biblia parlasqanta kasukoj runasmanta, mana kasukoj runasmantawan. Chaytaj yanapawasun chay runaspa kausayninkumanta yachakunapaj (Romanos 15:4;  1 Corintios 10:6). Kay libroqa 14 tʼaqaspi tʼaqasqa kashan. Sapa tʼaqaj qallariyninpitaj imatachus chay tʼaqapi yachakunanchejta willashan.

Wawasniykiwan kay libromanta uj capitulota leerispa, dibujosninmanta parlariwajchej. Chantá chay capitulopi rikhurej versiculosta leeriwajchej. Wawasniykita yanapay kay libroj yachachisqan, Bibliaj yachachisqanman jinapuni kasqanta reparanankupaj. Ajinallatataj uj machu runatapis yanapasunman imamantachus Biblia parlashasqanta yachachinapaj.

Munayku kay libro jovenesta, machitusta yanapananta Diospa Palabranmanta yachakunankupaj, yachakusqankuman jinataj kausakunankupaj. Ajinamanta paykunapis Jehová Diosta yupaychanqanku, llajtanmantaj yaykonqanku.