Cꞌuyashca huauqui panicuna:

Jehová Diosta adorajcunaca paipaj Shimi Bibliataca achcatami cꞌuyanchij. Chaimantami Bibliapica mana llullashpa huillaj historiacunata, alli consejocunatapish tarinchij. Shinallataj Jehová Dios familiacunaman cꞌuyaita ricuchishcatapish yachanchij (Salmo 119:105; Lucas 1: 3; 1 Juan 4:19). Ñucanchijca Diospaj Shimipi tiyaj valishca yuyaicunataca tucuicuna yachachunmi shungumanta munanchij. Chaimantami shuj sumaj libro llujshishcata cushicushpa huillanchij. Cai libropaj shutica: Bibliamanta yachana ñuca libro nishcami can. Cai libro ima shina cashcatami huillashun ninchij.

Cai librotaca huahuacunapi yuyashpami rurashcanchij. Pero jatuncunapish Bibliamanta yachanata munashpaca cai libromanta yachai tucuncunami. Bibliaca tucuicunapaj cashcamantami cai libropi tiyaj leccioncunamantaca tucuicuna yachai tucunchij. Chashna rurashpaca cushillami causashun.

Cai libroca Bibliapi parlashca punta familiamanta callarishpami huillan. Caipi tiyaj sumaj historiacunataca jahualla, intindinallatami rurashcanchij. Ashtahuanpish casi tucui historiacunatami ima shina pajtarishcata callarishpa churashcanchij.

Cai sumaj libroca Bibliapi tiyaj historiacunata parlanallapaj randica, quillcashca letracunahuanpish dibujocunahuanpish ñaupa tiempopi Diosta sirvijcuna ima shina causashcata, ima shina sintirishcata yuyachunmi ayudan.

Bibliaca Diosta cazujcunamanta, mana cazujcunamantapish parlashcatami cai libroca ricuchin. Chashnallataj paicunamanta imata yachai tucushcatami parlan (Romanos 15:4; 1 Corintios 10:6). Cai libroca 14 partecunatami charin. Cada callari partepimi ashalla shimicunapi imata yachagrishcata huillacun.

 Huahuacunata charishpaca paicunahuanmi shuj capitulota leyi pudinguichij, dibujocunamantapish parlanacui pudinguichij. Chai qꞌuipaca Bibliapi tiyaj versocunatapishmi leyi tucunguichij. Chashnami cancunapaj huahuacunamanca Bibliapi tiyaj versocunahuan imata yachachicushcata intindichinguichij. Jatuncunamanpish chashnallatajmi Bibliamanta yachachi tucunguichij.

Cai libro alli shunguta charij gentecunata ayudachunmi shungumanta munanchij. Joven cashpapish yuyaj cashpapish Diospaj Shimimanta yachashpaca paicunapaj causaipimi pajtachichun munanchij. Chashnami paicunapish Jehová Diosta sirvishpa paipaj familiapura tucungacuna.