Juyashca huauquipanicuna:

Jehová Diosta sirvijcunaca Diospa Shimi Bibliataca ninandami alicachinchi. Bibliapica tucuita na llullashpami yachachin. Ñucanchi causaipa ali consejocunatapashmi charin. Shinallata Jehová Dios tucuilla gentecunata juyashcatapashmi ricuchin (Salmo 119:105; Lucas 1:3; 1 Juan 4:19). Tucui gentecuna Bibliapa valishca yachachishcacunata yachajuchunmi munapanchi. Chaimandami, Bibliapica ¿imatata yachajuni? nishca librota llujchipashcanchi. Cai libropa huaquin yuyaicunata ricupashun.

Ashtahuanbachaca cai librotaca huahuacunapi pensarishpami llujchipashcanchi. Shinapash tucuicunami cai librohuan Bibliamanda yachajuita ushan. Bibliapa yachachishcacunaca mundo enteropi gentecunatami ayudan. Chaimandami tucuicunallata cai libropa capitulocunamanda yuyaicunata yachajushpaca, ashtahuan cushilla causaita ushashun.

Cai libroca callarimandapacha gentecunahuan ima pasashcatami yachachin. Chaipaca imalla pasashcata facil, intindirinallata churangapami esforzaripashcanchi.

Cai libroca ashtaca dibujocunatami charin. Shinallata intindirinalla shimicunahuan escribishca caimandami Bibliapi parlashca gentecunahuan ima pasashcata, imashina sintirishcatapash ali intindichun ayudan.

Cai libropica Bibliapi parlashca ashtaca gentecunamandami yachajugrinchi. Caipica Jehová Diosta cazuj gentecunamanda, na cazujcunamandapashmi parlan. Shinallata paicunapa ejemplomandapashmi yachajuita ushanchi (Romanos 15:4; 1 Corintios 10:6). Cai libroca 14 partecunatami charin. Cada partepi imatalla yachajugrijushcatami ashalla shimicunahuan intindichin.

 Quiquin huahuacunata charishpaca cada capitulota paicunahuan liishpa, imata yachajushcamandapash, dibujocunamandapash parlanallami capanguichi. Cada capitulopi Bibliamanda textocunatapash liinallami capanguichi. Shinallata cai libropa cada capítulo, Bibliapa yachachishcacunahuan igual cashcata intindichunbash ayudapaichi. Mashna huatacunata charijpipash chashnallatami cai librohuan Bibliamanda intindichun ayudaita ushapanguichi.

Huahuacuna, jovenguna, mayorcunapash cai librohuan Diospa Shimimanda ashtahuan yachajuchunmi munapanchi. Shinallata paicunapa causaipi pactachichunbash ayudapaichi. Shinami paicunapash Jehová Diosta adorashpa, Jehovapa familia cuenda tucuita ushanga.