Mangle phraljalen hem phenjalen,

Sar sluge e Jehovaskere, amen mangaja leskoro Lafi, i Biblija. Oj keda kerela lafi baši istorija, uverime siem kaj dela točna informacie, kaj isi la korisna sovetija hem pouke hem ko but šužo način sikavela amenge kaj o Devel mangela sa e manušen (Psalm 119:105; Luka 1:3; 1. Jovanovo 4:19). Mangaja te pomožina e javerenge da te sikljoven o skapocena čačipa taro e Devleskoro Lafi. Adaleske, milo amenge so akana isi amen akava lil, e naslovea „Pouke so šaj te sikljove tari Biblija“. Te dikha koja tani leskiri cel.

Akava lil prvenstveno tano kerdo e čhavenge. Ama, isto agjaar šaj te pomožinel e vozrasna manušenge so mangena te džanen poviše baši Biblija. Adaleske so i Biblija tani lil sa e manušenge, o pouke tari akaja publikacija šaj te pomožinen sekole manušeske te ovel čače srekjno.

O lil koristinela o bibliska izveštaija te šaj te raskažinel amenge so ulo taro početok keda sine kerdo o prvo manuš hem ponadari. Sine dendo baro trud te šaj o nastanija tari Biblija te pretstavinen pe ko jasno hem ednostavno način hem, kobor so šaj, ko redo sar so slučingje pe.

Ama, ko akava lil nane samo raskažime nastanija tari Biblija. O teksti hem o slike kerde tane te šaj te pretstavina amenge o nastanija so ule hem te haljova sar osetingje pe o manuša soj spomnime.

Akaja publikacija pomožinela amenge te dikha kaj i Biblija tani lil koja so kerela lafi bašo manuša so čače postojnena sine — manuša so šunena sine e Jehova hem manuša so na šunena le sine. Isto agjaar, pottikninela amen te sikljova taro lengoro primer (Rimjanite 15:4; 1. Korinkjanite 10:6).  Akava lil tano delimo ko 14 delija. Ko početok taro sekova delo tane dende o glavna pouke so šaj te sikljova len.

Ako sian roditeli, šaj zaedno te čhavea te čitine jekh lekcija, te keren lafi bašo slike hem palo adava te čitinen o bibliska stihija ko kola so temelinela pe i lekcija. Pomožin te čhaveske te haljol sar tane povrzime o bibliska stihija e poukencar tari lekcija. Slično agjaar šaj te kere keda pomožinea jekhe vozrasno manušeske te džanel i poraka tari Biblija.

Nadinaja amen kaj akava lil ka pomožinel sa e iskrena manušenge — e ternenge hem e phurenge — te sikljoven taro e Devleskoro Lafi hem te ikeren leskere pouke ko plo životo. Agjaar, ola da ka oven delo tari e Devleskiri familija kote so isi mangipe.