Manglje phraljaljen hem phenjaljen,

Sar e Jehovase sluge, amen mangaja oljeso Lafi, i Biblija. Uverime hijam so oj tačno mothovi i istorija, so isi la šukar savetija kola pomožinena te ovel amen pošukar dživdipe hem mothovi baro dokaz so o Jehova mangela e manušen (Psalam 119:105; Luka 1:3; 1. Jovanova 4:19). Amen viljestar mangaja te pomožina averendže te sikljon o čačipe koljestar pisini ko e Devljeso Lafi. Sebepi odova, amen hem ikaldžam akija knjiga koja vičini pe „Sikljov kotar priče andi Biblija“. Mangaja te phena nekobor lafija andi akija knjiga.

Akija knjiga najangljeder tani čerdi e čhavendže. Ama, oj šaj te pomožini hem e bare manušendže kola mangena te džanen pobuter andi Biblija. Odoljese soj tani i Biblija sa e manušendže, sigurna hijam so sarinendže amendže ka koristini te podsetina amen ko olake pouke, kola šaj te pomožinen amen čače te ova bahtalje.

O događaja ki akija knjiga tane ljende andi Biblija hem vačerena so sa ulo, sar hine stvorime o prva manuša. Dindžam sa amendar te mothova e biblijake izveštaja ko jekh jasno hem jednostavno način hem kobor god šaj mothovdžam ljen redoja sar so desindže pe.

Ama, ki akija knjiga na vačerdžam samo o priče andi Biblija. Hem o tekst hem o slike tane adžahar čerde te šaj te pomožinen tumendže te haljon so čače ulo hem sar osetindže pe o manuša koljendar vačeri pe.

Akija knjiga pomožini amen te haljova so i Biblija tani knjiga koja vačeri ando manuša – ando okola kola šundže e Jehova hem ando okola kola na šundže lje. Isto adžahar, podstaknini amen te sikljova ando oljengo primer (Rimljanima 15:4; 1. Korinćanima 10:6).  I knjiga tani podelimi ko 14 delija. Ko početko ando svako deo, tane o glavna pouke ando nekobor priče koljendar šaj diso te sikljova.

Ako isi tumen čhave, šaj zajedno oljencar te čitinen akija knjiga, te dikhen o slike hem te vačeren odoljestar. Palo odova, šaj te čitinen o stihija ki Biblija koljendar tani čerdi odija priča. Pomožinen ljendže te povezinen i priča odoljeja so čitindžen andi Bibija. Ko isto način, šaj te pomožine hem jekhe bare manušese te pendžari odova sostar vačeri pe ki Biblija.

Nadinaja amen so akija knjiga ka pomožini sa e iskreno manušendže, sar e ternendže adžahar hem e phurendže te sikljon ando e Devljeso Lafi hem te ičeren pe ko odova so sikljilje. Adžahar hem on ka služinen e Jehovase hem ka oven deo andi oljesi manglji porodica.