Anyakukhulupira Andzathu Akufunika:

Ninga alambiri a Yahova, ife tisafuna Mafalace, Bhibhlya. Tiri na cinyindiro cakuti Bhibhlya isatipanga mbiri zandimomwene, isapereka citsogolero cakunyindirika toera kukhala maso na cipangizo cakuphata ntima caufuni wa Yahova kuna anthu. (Masalmo 119:105; Luka 1:3; 1 Jwau 4:19) Ife tisafuna kakamwe kuphedza anango kudziwa undimomwene unagumanika m’Mafala a Mulungu. Na thangwi ineyi, tiri akutsandzaya kubulusa bukhu ino, Pfundzani Mbiri za M’Bhibhlya. Tinakupangani pinthu pingasi pinagumanika m’bukhu ino.

Bukhu ino yacitirwa makamaka anapiana. Mbwenye iyo inakwanisambo kuphedza akulu akuti asafuna kupfundza pizinji thangwi ya Bhibhlya. Nakuti Bhibhlya ndi bukhu ya anthu onsene, mwakukhonda penula tinaphindula tingadinga pontho mphangwa zenezi zakuti zinatiphedza toera kukhala akutsandzaya kakamwe.

Mukuphatisira Bhibhlya, bukhu ino isalonga pya mbiri ya anthu kutomera ndzidzi udacitwa pinthu. Tacita pyonsene pidakwanisa ife toera kufokotoza mbiri zenezi za m’Bhibhlya mwakubveka mwadidi, mwakukhonda nentsa mbatiziikha m’bukhu ino mwakubverana na ndandanda udacitika ipyo.

Mbwenye bukhu ino isalonga pizinji kupiringana kulonga basi ene mbiri za Bhibhlya. Bukhu ino iri na malemba na pithundzithundzi toera kuphedza nyakuleri kunyerezera ninga ali mu ndzidzi udacitika mbiri zenezi na kuona mabvero akhali na anthu anewa.

Bukhu ino inatiphedza toera kuona kuti Bhibhlya ndi bukhu yakuti isalonga pya anthu adabvera Yahova na ale adakhonda kumbvera. Iyo inatiphedza kuona kuti tisafunika kutowezera pitsandzo pya anthu api. (Aroma 15:4; 1 Akorinto 10:6) Bukhu ino yagawiwa m’makhundu 14.  Pakutoma kwa khundu ibodzi na ibodzi pana mafala acigwagwa a mbiri zingasi zinafuna ife kupfundza.

Khala ndimwe nyakubala, lerini mbiri zenezi na mwananu mbamucedza naye thangwi ya pithundzithundzi. Buluka penepo, uwiri wanu lerini malemba adabuluswa mbiri inaleri imwe. Phedzani mwananu toera kubvesesa pinaleri iye m’Bhibhlya na kubverana kwapyo na mbiri zinagumanika m’bukhu ino. Munakwanisa kucita pibodzi pyene khala mukuphedza nkulu toera kubvesesa mwadidi Bhibhlya.

Tisadikhira kuti bukhu ino inaphedza anthu onsene—ana na akulu ene, toera kupfundza Mafala a Mulungu na kuphatisira mbiri zenezi mu umaso wawo. Angacita pyenepi, anakwanisambo kulambira Mulungu mbakhala atumiki ace akufunika.