Ho Anareo Finoa Raiky Aminay:

Mpanomponi-Jehovah tsika ka teantsika ty Baiboly. Matoky tsika hoe marina ty tantara anatiny ao, mitari-dala antsika amy fiaina, sady manaporofo fa tea antsika vatany Jehovah. (Salamo 119:105; Lioka 1:3; 1 Jaona 4:19) Tena teantsika ty hanampy ty hafa mba hahay ty fahamarina lafovily amy Safà-Ndranahary ao. Ka falifaly zahay mampiboaky ani-boky hoe “Hahay Raha Maro ze Mianatsy Baiboly” toy. Ho zao ty mikasikasiky ani-boky toy.

Natao ho an’ajà boky toy, fe azo anampea ani-ze olo ta hianatsy Baiboly avao koa ndre fa be aza. Azo antoky fa hahasoa antsika ty mianatsy azy, satria boky natao ho an’olo iaby ty Baiboly. Ho sambatsy vatany tsika laha mandiniky ani-tantara reo.

Fa maro biby ty tantaran’olombelo liany namorona ani-zao tontolo zao. Mitantara ani-rey boky toy ka mampiasa tantara baka amy Baiboly ao. Natao farani-ze tsotra noho mazava tantara reo amy boky toy ato, le nalahatsy araky ze nisehoany.

Fe tsy hoe mitantara ty tantara amy Baiboly ao avao boky toy. Natao hahavelombelo ani-tantara amy Baiboly ao rey ty sary noho ty fanorata azy, sady natao hahafahantsika hahatakatsy ty fihetseham-pon’olo anaty tantara rey ao.

Ho hitantsika baka amy boky toy koa hoe boky miresaky fiainan’olo ty Baiboly sady mampirisiky antsika handramby fianara baka amy tantaran-drozy reo. Misy olo nanoriky ty safàni-Jehovah ty ao, fe misy tsy nanoriky koa. (Romanina 15:4; 1 Korintianina 10:6) Misy fizarà 14 boky toy. Laha vo manomboky ty fizarà kiraidraiky, le fintininy eo tse ty raha sisany hianara anatiny ao.

 Laha manan’anaky iha, le afaky mamaky fianara raiky nareo moroanaky, bakeo mifampiresaky mikasiky sary. Afaky mamaky ty andinin-teny fototsy nareo roe afarani-zay. Ampeo ie soa ho hainy hoe ino ifandrambesani-raha nivakiny tamy Baiboly ao iny amy ty raha ianaranareo amy boky ao. Mety hisy vokatsiny soa laha manahatahaky ani-zay koa ty atao lafa manampy olobe, soa ho azony ty teani-Baiboly hambara.

Mitamà zahay fa hanampy ani-ze mahity fo boky toy, ka hahay ty Safà-Ndranahary noho hanoriky ty raha nianarany ie ndre tanora ndre antitsy. Ho afaky hanompo a-Ndranahary anatini-fianakaviambe teany ie amy zay.